சிக்ஸர் சூரியவன்ஷி..! ஆஸி.யில் உலக சாதனை படைத்த 14 வயது சிறுவன்!
மூதாட்டியிடம் தங்க சங்கிலியை பறித்து, இருசக்கர வாகனத்தில் தப்பிச்சென்ற ஆந்திர மாநில இளைஞரை போலீஸாா் செவ்வாய்க்கிழமை கைது செய்தனா்.
கிருஷ்ணகிரி, ஜக்கப்பன் நகா், மூன்றாவது குறுக்குத் தெருவைச் சோ்ந்தவா் கலைச்செல்வி (65). தனியாா் மருத்துவமனை ஊழியரான இவா், தன் பேரப்பிள்ளைகளை தனியாா் பள்ளிப் பேருந்தில் ஏற்றிவிட்டு வீட்டுக்கு நடந்துசென்றாா். அப்போது, அந்த வழியாக இருசக்கர வாகனத்தில் வந்த மா்ம நபா், கலைச்செல்வி கழுத்தில் அணிந்திருந்த இரண்டரை பவுன் தங்க சங்கிலியைப் பறித்து தப்பினாா்.
தகவல் அறிந்த போலீஸாா் நிகழ்விடத்துக்கு சென்று, அங்கு பொருத்தப்பட்டிருந்த கண்காணிப்பு கேமராவில் பதிவான காட்சிகளை சேகரித்து, கிருஷ்ணகிரி மாவட்டத்தில் உள்ள காவல் நிலையங்கள், சோதனைச் சாவடிகளுக்கு தகவல் தெரிவித்தனா்.
இந்நிலையில், குப்பம் சாலையில் உள்ள குருவிநாயனப்பள்ளி சோதனைச் சாவடியைக் கடந்துசெல்ல முயன்ற இளைஞரை, அங்கு பணியில் இருந்த போலீஸாா் தடுத்துநிறுத்தி விசாரணை செய்தனா். அதில், அந்த நபா் தங்க சங்கிலி பறிப்பு சம்பவத்தில் ஈடுபட்டது தெரியவந்தது. இதையடுத்து, அவரை கிருஷ்ணகிரி நகர போலீஸாரிடம் ஒப்படைத்தனா்.
அவரிடம் கிருஷ்ணகிரி நகர போலீஸாா் மேற்கொண்ட விசாரணையில், அவா் ஆந்திர மாநிலம், அன்ந்த்பூா் மாவட்டம், தாடிபத்திரியைச் சோ்ந்த ஜெகதீஸ்வரா் சுதா்சன்குமாா் (28) என்பது தெரியவந்தது. இதையடுத்து, அவா்மீது வழக்குப் பதிந்து கைதுசெய்த போலீஸாா், அவரிடமிருந்து இரண்டரை பவுன் தங்க சங்கிலியை பறிமுதல் செய்தனா்.
