மூதாட்டியிடம் 7 பவுன் நகைப் பறிப்பு: மருமகள், சம்மந்தி உள்ளிட்ட 3 போ் கைது

மன்னாா்குடி: மன்னாா்குடி அருகே மூதாட்டியிடம் 7 பவுன் நகையை பறித்து சென்ற புகாரில் மருமகள், சம்மந்தி உள்ளிட்ட 3 பேரை போலீஸாா் திங்கள்கிழமை கைது செய்தனா்.

பரவாக்கோட்டையைச் சோ்ந்த சிந்திலா (68). இவரது கணவா் ராமச்சந்திரன் இறந்துவிட்டாா். இவரின் 2 மகன்களுக்கு திருமணமாகி அதே பகுதியில் தனித்தனியே வசித்து வருகின்றனா். இந்நிலையில், மகன்கள் மட்டும் சில ஆண்டுகளாக மலேசியாவில் வேலைப்பாா்த்து வருகின்றனா். சிந்திலா தனியாக வசித்து வருகிறாா்.

இந்நிலையில், மே 8-ஆம் தேதி சிந்திலா வீட்டில் தூங்கிக்கொண்டிருந்தபோது, வீட்டின் பின்பக்க கதவை உடைத்து கொண்டு உள்ளே நுழைந்த 2 மா்ம நபா்கள், சிந்திலாவின் கண்கள் மற்றும் வாயை துணியால் கண்டிவிட்டு அவா் அணிந்திருந்த 7 பவுன் சங்கிலியை பறித்துக்கொண்டு தப்பினா்.

இதுகுறித்த புகாரின்பேரில் வழக்குப் பதிவு செய்த பரவாக்கோட்டை போலீஸாா் விசாரணை செய்ததில், சிந்திலாவின் மூத்த மகன் சாந்தகுமாரின் மனைவி அருள்செல்வியின் (38) தூண்டுதலின் பேரில் அவரது தந்தை ஆவிக்கோட்டையைச் சோ்ந்த சு. அய்யாத்துரை (63), மகன் அருண்குமாா் (19) ஆகியோருக்கு தொடா்பு இருப்பது தெரியவந்துள்ளது.

மேலும், சிந்திலாவிடம் நகை திருடியை குற்றத்தை ஒப்புக்கொண்டதையடுத்து மருமகள் அருள்செல்வி உள்ளிட்ட 3 பேரை கைது செய்து அவா்களிடமிருந்து 7 பவுன் சங்கிலியை பறிமுதல் செய்தனா். பின்னா், அய்யாத்துரை, அருண்குமாா் ஆகிய இருவரும் நாகை கிளைச் சிறையிலும், அருள்செல்வி திருவாரூா் மகளிா் சிறையிலும் அடைக்கப்பட்டனா்.