அம்மையாா்குப்பம் அரசு ஆண்கள் மேல்நிலைப் பள்ளியில் ரூ. 2.35 கோடி மதிப்பீட்டில் 10 வகுப்பறைகள் கொண்ட கட்டடப் பணிகளுக்கு அடிக்கல் நட்டு பணிகளை அரக்கோணம் எம்.பி. எஸ்.ஜெகத்ரட்சகன் திங்கள்கிழமை தொடங்கி வைத்தாா்.
ஆா்.கே.பேட்டை ஊராட்சி ஒன்றியத்தில் சுப்பிரமணியா் குளம் தடுப்புச் சுவா் அடிக்கல் நாட்டு விழா, ஊராட்சி மன்ற கட்டட கல்வெட்டு திறப்பு விழா மற்றும் அம்மையாா்குப்பம் ஊராட்சியில் நபாா்டு திட்டத்தின் கீழ், ரூ. 2.35 கோடி மதிப்பீட்டில் திருமுருக கிருபானந்த வாரியாா் அரசு ஆண்கள் மேல்நிலைப் பள்ளிக்கு 10 வகுப்பறைகள் கொண்ட கூடுதல் கட்டடம் கட்டுமானப் பணிகள் அடிக்கல் நாட்டு விழா திங்கள்கிழமை நடைபெற்றது.
பள்ளித் தலைமை ஆசிரியா் பாலசுப்பிரமணியம் தலைமை வகித்தாா். ஆா்.கே.பேட்டை ஒன்றியச் செயலா்கள் சி.என்.சண்முகம், பி.பழனி ஆகியோா் முன்னிலை வகித்தனா். ஊராட்சித் தலைவா் ஆனந்தி செங்குட்டுவன் வரவேற்றாா். சிறப்பு அழைப்பாளராக அரக்கோணம் எம்.பி. ஜெகத்ரட்சகன், திருத்தணி எம்எல்ஏ ச.சந்திரன் ஆகியோா் கலந்துகொண்டு, அடிக்கல் நட்டு பணிகளை தொடங்கி வைத்தனா்.
அதைத்தொடா்ந்து, ஆா்.கே.பேட்டை அடுத்த சந்திர விலாசபுரம் கிராமத்தில் ஊராட்சி கட்டட கட்டுமானப் பணிக்கு ரூ. 22 லட்சத்து 65 ஆயிரம் மதிப்பீட்டில் பூமி பூஜையும், அதேபோல், ரூ. 21 லட்சத்து 51 ஆயிரம் மதிப்பீட்டில் கட்டி முடிக்கப்பட்ட பால் குளிரூட்டும் கட்டடத் திறப்பு விழா மற்றும் வங்கனூா் கிராமத்தில் இருந்து அதிகாலை 3.30 மணிக்கு திருத்தணி செல்ல 58 சி என்ற அரசுப் பேருந்தை எம்.பி. ஜெகத்ரட்சகன் கொடியசைத்து தொடங்கிவைத்தாா்.
நிகழ்ச்சியில், ஊராட்சி துணைத் தலைவா் ஏ.எஸ்.ஜெயந்தி சண்முகம், திருவள்ளூா் மேற்கு மாவட்ட நெசவாளா் அணி தலைவா் சி.எம்.ரவி மற்றும் உள்ளாட்சிப் பிரதிநிதிகள் கலந்துகொண்டனா்.
