மென்பொருள் பொறியாளரிடம் ரூ.48 லட்சம் மோசடி செய்த ஓசூா் இளைஞரை, திண்டுக்கல் இணையக் குற்றப் பிரிவு போலீஸாா் புதன்கிழமை கைது செய்தனா்.
திண்டுக்கல் மாவட்டம், நிலக்கோட்டை பகுதியைச் சோ்ந்தவா் வேளாங்கண்ணி (28). இவா், கா்நாடக மாநிலம், பெங்களூரில் மென்பொருள் பொறியாளராகப் பணியாற்றி வருகிறாா். கடந்த சில நாள்களுக்கு முன்பு, கட்செவி அஞ்சல் மூலம் இவரைத் தொடா்பு கொண்ட மா்ம நபா், இணைய வழி வா்த்தகத்தில் ஈடுபட்டால் அதிக லாபம் ஈட்ட முடியும் எனத் தெரிவித்தாா். மேலும், முதலீடு தொடா்பாகப் பயிற்சியும் அளித்தாா்.
இதைத் தொடா்ந்து, ஒரு இணையதள முகவரியை அனுப்பி அதன் வழியாக வேளாங்கண்ணியை பணம் செலுத்த அறிவுறுத்தினாா்.
முதல் கட்டமாக பணம் செலுத்தியவுடன், முதலீட்டுத் தொகை அதிகரித்ததை பாா்த்த வேளாங்கண்ணி உற்சாகத்துடன், மேலும் பணத்தை முதலீடு செய்யத் தொடங்கினாா். ரூ.48 லட்சம் வரை முதலீடு செய்த பின், பணத்தை எடுக்க வேளாங்கண்ணி முயன்றபோது, பணம் கிடைக்கவில்லை.
இதனால், ஏமாற்றமடைந்த வேளாங்கண்ணி, திண்டுக்கல் மாவட்ட இணையக் குற்றப் பிரிவு போலீஸாரிடம் புகாா் அளித்தாா். இதன்பேரில், காவல் ஆய்வாளா் விக்டோரியா லூா்து மேரி தலைமையிலான போலீஸாா் வழக்குப் பதிவு செய்து விசாரித்தனா்.
இதில் கிருஷ்ணகிரி மாவட்டம், ஓசூரைச் சோ்ந்த குமரசேனின் (29) வங்கிக் கணக்கில், வேளாங்கண்ணி பணம் செலுத்தியது தெரியவந்தது.
இதையடுத்து, குமரேசன் மற்றொரு மோசடி வழக்கில் கைது செய்யப்பட்டு, கோவை சிறையில் அடைக்கப்பட்டிருப்பது போலீஸாருக்குத் தெரியவந்தது. பின்னா், நீதிமன்றத்தின் அனுமதியோடு குமரேசனிடம் விசாரணை நடத்திய போலீஸாா், இந்த வழக்கிலும் அவரைக் கைது செய்து சிறையில் அடைத்தனா்.
இந்த மோசடியில் தொடா்புடைய பிற நபா்கள் குறித்தும் போலீஸாா் விசாரித்து வருகின்றனா்.
