விழுப்புரம் அருகே பல்லவா் கால மூத்ததேவி சிற்பம்

விழுப்புரம் அருகே கண்டமானடி கிராமத்தில் பல்லவா் காலத்தைச் சோ்ந்த மூத்ததேவி சிற்பம் கண்டறியப்பட்டது.

விழுப்புரம் அருகேயுள்ள கண்டமானடி கிராமம், அரசு ஊழியா் நகரையொட்டியுள்ள பகுதியில் வரலாற்று ஆய்வாளா் கோ.செங்குட்டுவன் உள்ளிட்டோா் அண்மையில் கள ஆய்வு மேற்கொண்டனா்.

அப்போது, முற்கால பல்லவா் காலத்தைச் சோ்ந்த (கி.பி. 7-ஆம் நூற்றாண்டு) மூத்ததேவி சிற்பம் அங்கு இருந்தது கண்டறியப்பட்டது.

பலகைக் கல்லில் அழகிய தலை அலங்காரத்துடன் வடிக்கப்பட்டுள்ள இந்தச் சிற்பத்தில் மூத்ததேவி சரிந்த மாா்பு, வயிற்றுடன் கால்களைத் தொங்கவிட்டு அமா்ந்த நிலையில் காட்சியளிக்கிறாா். காதுகள், கழுத்து, கைகளில் ஆபரணங்கள் அணி செய்கின்றன.

வலது கை தாமரை மொட்டினை ஏந்தியுள்ளது. இடதுகை செல்வக் குடத்தின் மீது வைத்த நிலையில் காணப்படுகிறது. சிற்பத்தில் மூத்த தேவியின் மகன் மாந்தன், மகள் மாந்தி ஆகியோா் நின்ற நிலையில் காட்டப்பட்டுள்ளனா். வழக்கமாக இடம்பெறும் காக்கைக் கொடி இந்த சிற்பத்தில் காணப்படவில்லை.

வடமொழியில் ஜேஷ்டா என்று அழைக்கப்படும் மூத்ததேவி வழிபாடு மிகவும் தொன்மை வாய்ந்தது. விழுப்புரம் மாவட்டத்தில் பிடாகம், நன்னாடு, செல்லபிராட்டி உள்ளிட்ட இடங்களில் மூத்ததேவியின் சிற்பங்கள் கண்டறியப்பட்டுள்ளன.

அந்த வகையில் கண்டமானடியில் கண்டறியப்பட்டுள்ள மூத்ததேவி சிற்பம் வரலாற்று முக்கியத்துவம் பெற்றுள்ளது. 1400 ஆண்டுகள் பழைமைவாய்ந்த இந்தச் சிற்பத்தை உரிய முறையில் பாதுகாக்க வேண்டும் செங்குட்டுவன் வேண்டுகோள் விடுத்தாா்.