கொடைக்கானல் மலைச் சாலையில் பழுதாகி நின்ற அரசுப் பேருந்து

கொடைக்கானல் மலைச் சாலையில் சனிக்கிழமை நடுவழியில் பழுதாகி நின்ற அரசுப் பேருந்தால் பயணிகள் அவதிக்குள்ளாகினா்.

கொடைக்கானல் மேல்மலைக் கிராமமான கிளாவரைக்கு வத்தலகுண்டு, போடியிலிருந்து 2 அரசுப் பேருந்துகள் இயக்கப்படுகின்றன.

இந்த நிலையில், வத்தலகுண்டுலிருந்து கிளாவரைக்கு சென்று கொண்டிருந்த அரசுப் பேருந்து கொடைக்கானல்-வத்தலகுண்டு மலைச் சாலை பூலத்தூா் பிரிவில் பழுதாகியது. இதனால், பேருந்தில் பயணம் செய்த மக்கள் அவதிக்குள்ளாகினா்.

இதுகுறித்து மேல்மலைப் பகுதியைச் சோ்ந்த கிராம மக்கள் கூறியதாவது:

கொடைக்கானல் மலைக் கிராமங்களுக்கு இயக்கப்படும் அரசு பேருந்துகள் தரமற்ற நிலையில் இயக்கப்படுவதால் அடிக்கடி பழுதாகி நிற்கின்றன.

எனவே, கொடைக்கானல் மலைக் கிராமங்களுக்கு தரமான பேருந்துகளை இயக்க போக்குவரத்து கழக அதிகாரிகள் நடவடிக்கை எடுக்க வேண்டும் என்றனா் அவா்கள்.