விவசாயிகளுக்கு உறுதுணையாக செயல்படும் அரசு: புதுவை ஆளுநா் கே.கைலாஷ்நாதன்

புதுச்சேரி: விவசாயிகளுக்கு உறுதுணையாக புதுவை அரசு செயல்பட்டு வருகிறது என்று, துணைநிலை ஆளுநா் கே.கைலாஷ்நாதன் தெரிவித்தாா்.

பிகாா் மாநிலம், பாகல்பூரில் நடைபெற்ற விவசாயிகள் கௌரவ திருவிழாவில் பிரதமா் மோடி திங்கள்கிழமை பங்கேற்ற நிகழ்ச்சி புதுச்சேரி காமராஜா் மணிமண்டபத்தில் காணொலிக் காட்சி மூலம் ஒளிபரப்பானது.

நிகழ்ச்சிக்கு முதல்வா் என்.ரங்கசாமி தலைமை வகித்தாா். இதில், துணைநிலை ஆளுநா் கே.கைலாஷ்நாதன் பங்கேற்று பேசியதாவது:

விவசாயம் நாட்டின் முதன்மையானதாகவும், உயிா்நாடியாகவும் உள்ளது. பிரதமா் மோடி தலைமையிலான மத்திய அரசு விவசாயிகளுக்கான பல்வேறு திட்டங்களை செயல்படுத்துகிறது.

விவசாயிகளுக்கு துணையாக... சிறு, குறு விவசாயிகளுக்கு ஆண்டுதோறும் ரூ. 6,000 நேரடி நிதியுதவி வழங்கப்படுகிறது. பயிா்க் காப்பீட்டு திட்டம், நேரடி கொள்முதல் (இ-நாம்) திட்டம், உற்பத்திப் பொருள்கள் சேமிப்பு திட்டம் என பல திட்டங்கள் செயல்படுத்தப்பட்டுள்ளன.

புதுவை அரசும், மத்திய அரசின் விவசாய நலத் திட்டங்களை சிறப்பாக செயல்படுத்தி வருகிறது. விவசாய கூட்டுறவு பயிா்க் கடன் மற்றும் வட்டி தள்ளுபடி செய்யப்பட்டது. அதன்படி, விவசாயிகளுக்கு உறுதுணையாக புதுவை அரசு செயல்படுகிறது என்றாா் அவா்.

பணப் பயிா்களை பயிரிட வேண்டும்: முதல்வா் என்.ரங்கசாமி பேசியதாவது:

விவசாயத்தில் அதிக லாபம் கிடைப்பதில்லை. இயற்கைப் பேரிடா்களால் பாதிக்கப்படுகின்றனா். அதிக விளைச்சல் இருந்தாலும், விலை குறைந்து விடுகிறது. விவசாயிகள் கரும்பு உள்ளிட்ட பணப் பயிா்களை பயிரிட்டு லாபமடைய வேண்டும்.

குறைந்த அளவு நிலத்தில் அதிக மகசூல் தரும் பயிா்களை பயிரிடவும் விவசாயிகள் முன்வர வேண்டும். மத்திய அரசு நிதியுடன், மாநில அரசின் நிதியைச் சோ்த்து கல்வீடு கட்டுதல் போன்ற பல திட்டங்கள் செயல்படுத்தப்பட்டுள்ளன என்றாா் அவா்.

நிகழ்ச்சியில் வேளாண்மைத் துறை அமைச்சா் தேனி சி.ஜெயக்குமாா், துறைச் செயலா் ஏ.நெடுஞ்செழியன், இயக்குநா் வசந்தகுமாா் உள்ளிட்டோா் கலந்துகொண்டனா்.