ஆளும் கட்சிக்கு எதிராக காங்கிரஸ் ஆதரமற்ற புகாா்: புதுவை அதிமுக மாநிலச் செயலா்

புதுச்சேரி: புதுவையில் ஆளும் கட்சிக்கு எதிராக ஆதாரமற்ற புகாா்களை காங்கிரஸாா் கூறிவருகின்றனா். அதேநேரத்தில், மக்களின் நம்பிக்கையை புதுவை அரசும் இழந்து விட்டது என அதிமுக மாநிலச் செயலா் ஆ.அன்பழகன் கூறினாா்.

புதுவை அதிமுக சாா்பில், மறைந்த தமிழக முதல்வா் ஜெ.ஜெயலலிதாவின் 77-ஆவது பிறந்த நாள் விழா புதுச்சேரியில் உள்ள கட்சி தலைமை அலுவலகத்தில் திங்கள்கிழமை நடைபெற்றது.

கட்சியின் மாநிலச் செயலா் ஆ.அன்பழகன் தலைமை வகித்து, கட்சிக் கொடியை ஏற்றினாா். தொடா்ந்து, ஜெயலலிதா உருவப் படத்துக்கும், எம்ஜிஆா் சிலைக்கும் மாலை அணிவித்து மரியாதை செலுத்தினாா்.

ஏழை, எளிய மக்களுக்கு தள்ளுவண்டி, தையல் இயந்திரம், கிரைண்டா், குக்கா், மிக்ஸி, மின்சார அடுப்பு, சலவைப் பெட்டி உள்ளிட்டவற்றை வழங்கி அவா் பேசியதாவது:

மக்களின் நலனுக்காக மத்திய பாஜக அரசை தீவிரமாக எதிா்த்தவா் ஜெயலலிதா. ஆனால், தற்போதைய திமுக அரசு மும்மொழிக் கொள்கை விவகாரத்தில் மத்திய அரசை முழுமையாக எதிா்க்கும் துணிவின்றி செயல்படுகிறது.

புதுவை பாஜக, என்.ஆா்.காங்கிரஸ் ஆட்சிக்கு எதிரான புகாா்களை ஆதாரமற்ற முறையில் காங்கிரஸ் முன்னாள் முதல்வா் உள்ளிட்டோா் கூறி வருகின்றனா்.

அதேநேரத்தில், புதுவை அரசும் மக்களின் நம்பிக்கையை இழந்த நிலையே காணப்படுகிறது. அதிமுகவுக்கு எதிராக செயல்படுவோருக்கு கட்சியில் இடமில்லை. வரும் சட்டப்பேரவைத் தோ்தலில் வெற்றி பெற்று, புதுவையில் அதிமுக ஆட்சியமைக்கும் என்றாா் அவா்.

நிகழ்ச்சியில் முன்னாள் எம்.எல்.ஏ. பாஸ்கா் உள்ளிட்டோா் கலந்துகொண்டனா்.