வீட்டின் பூட்டை உடைத்து பணம் திருட்டு

ஆண்டிபட்டி அருகே வீட்டின் பூட்டை உடைத்து ரூ. ஒரு லட்சத்து 2,000, தங்க நகை திருடு போனதாக போலீஸாா் வழக்குப் பதிவு செய்தனா்.

தேனி மாவட்டம், ஆண்டிபட்டி அருகேயுள்ள கன்னியப்பபிள்ளைபட்டி, ஜோதி நகரைச் சோ்ந்தவா் லட்சுமணன் (50). இவா், கும்பாம்பட்டி விலக்கில் உள்ள மறவபட்டி கண்மாய் அருகே செங்கல் காளவாசல் வைத்து நடத்தி வருகிறாா்.

இந்த நிலையில், லட்சுமணன் காளவாசலில் உள்ள தனது வீட்டை பூட்டி விட்டு, கன்னியப்பிள்ளைபட்டிக்குச் சென்றாா். அவா் திரும்ப வந்த பாா்த்த போது வீட்டுக் கதவின் பூட்டு, பீரோவின் பூட்டு உடைக்கப்பட்டு ரூ. ஒரு லட்சத்து 2,000, அரை பவுன் எடையுள்ள தங்க மோதிரம், கண்காணிப்பு கேமரா உபகரணங்கள் திருடு போனது தெரிய வந்தது.

இதுகுறித்து ராஜதானி காவல் நிலைய போலீஸாா் வழக்குப் பதிந்து விசாரிக்கின்றனா்.