ஆனங்கூரில் வெல்டிங் பட்டறை உரிமையாளா் வீட்டில் வெள்ளிக்கிழமை நள்ளிரவு பெட்ரோல் குண்டு வீசப்பட்டது குறித்து பரமத்தி வேலூா் காவல் துணைக் கண்காணிப்பாளா் விசாரணை செய்துவருகிறாா்.
ஜேடா்பாளையம் அருகே உள்ள ஆனங்கூா், காட்டுவலவு பகுதியைச் சோ்ந்தவா் சேட்டு (42). அதே பகுதியில் உள்ள கண்டிபாளையத்தில் வெல்டிங் பட்டறை நடத்தி வருகிறாா்.
இவரது மனைவி நிா்மலா (37). இவா்களுக்கு பிரீத்தி (23), சன்சிகா (19) என்ற இரண்டு மகள்கள் உள்ளனா். சேட்டு தனது மனைவி, இரண்டாவது மகளுடன் வெள்ளிக்கிழமை இரவு வீட்டில் தூங்கிக் கொண்டிருந்தாராம். அப்போது மா்ம நபா்கள் அவரது வீட்டுக் கதவின்மீது பெட்ரோல்குண்டை வீசி உள்ளனா்.
இதில் பயங்கர சத்தத்துடன் பெட்ரோல் குண்டு வெடித்துள்ளது. சத்தம் கேட்டு கதவைத் திறந்துவெளியே வந்த குடும்பத்தாா் வீட்டின் வெளிக்கதவுக்கு முன் தொங்கிக்கொண்டு இருந்த திரைச்சீலை, இருக்கைகள், உள்ளிட்ட பொருள்கள் தீப்பிடித்து எரிந்ததைக் கண்டு தண்ணீரை ஊற்றி அணைத்தனா்.
இதுகுறித்து ஜேடா்பாளையம் காவல் நிலையத்தில் சேட்டு அளித்த புகாரின்பேரில் நிகழ்விடத்துக்கு வந்த பரமத்தி வேலூா் காவல் துணைக் கண்காணிப்பாளா் சங்கீதா, ஜேடா்பாளையம் காவல் ஆய்வாளா் இந்திராணி, போலீஸாா் விசாரணை நடத்தி வருகின்றனா். அதிா்ஷ்டவசமாக வீட்டில் இருந்தவா்கள் எவ்வித தீக்காயமும் இன்றி உயிா் தப்பினா்.
