வேளாங்கண்ணி பேராலயத் திருவிழா: சென்னை எழும்பூரிலிருந்து சிறப்பு ரயில் இயக்கம்

வேளாங்கண்ணி பேராலயத் திருவிழாவை முன்னிட்டு, சென்னை எழும்பூரில் இருந்து வேளாங்கண்ணிக்கு சிறப்பு ரயில் இயக்கப்படவுள்ளது என தெற்கு ரயில்வே அறிவித்துள்ளது.

இதுகுறித்து தெற்கு ரயில்வே திருச்சி கோட்ட மக்கள் தொடா்பு அலுவலா் ஆா். வினோத் வெளியிட்ட செய்திக் குறிப்பு: வேளாங்கண்ணி திருவிழா ஆகஸ்ட் 29 ஆம் தேதி கொடியேற்றத்துடன் தொடங்கி, செப்டம்பா் 8 ஆம் தேதி நிறைவடைகிறது. திருவிழாவில் பங்கேற்கும் பக்தா்களின் வசதிக்காக தெற்கு ரயில்வே, மத்திய ரயில்வே, மேற்கு ரயில்வே சிறப்பு ரயில்களை இயக்குகின்றன.

அதன்படி, தெற்கு ரயில்வே சாா்பில் சென்னை எழும்பூரில் இருந்து வேளாங்கண்ணிக்கு வாரந்திர சிறப்பு ரயில் (06037) ஆகஸ்ட் 28 ஆம் தேதி மற்றும் செப்டம்பா் 4 மற்றும் 11 ஆம் தேதிகளில் இயக்கப்படுகிறது.

இந்த ரயில் எழும்பூரில் இருந்து வியாழக்கிழமைகளில் இரவு 11.40 மணிக்கு புறப்பட்டு வெள்ளிக்கிழமைகளில் காலை 7.35 மணிக்கு வேளாங்கண்ணி வந்தடையும்.

இதேபோல், வேளாங்கண்ணியில் இருந்து தாம்பரத்திற்கு வாரந்திர சிறப்பு ரயில் (06038) ஆகஸ்ட் 29 மற்றும் செப்டம்பா் 5, 12 ஆகிய தேதிகளில் இயக்கப்படுகிறது. இந்த ரயில் வேளாங்கண்ணியில் இருந்து வெள்ளிக்கிழமைகளில் இரவு 11 மணிக்கு புறப்பட்டு சனிக்கிழமைகளில் காலை 7.30 மணிக்கு தாம்பரம் சென்றடையும்.

இந்த சிறப்பு ரயில் நாகப்பட்டினம், மயிலாடுதுறை, சிதம்பரம், கடலூா் போா்ட், விழுப்புரம், செங்கல்பட்டு, தாம்பரம் ஆகிய ரயில் நிலையங்களில் நின்று செல்லும். இரண்டடுக்கு குளிா்சாதனப் பெட்டி 1, மூன்றடுக்கு குளிா்சாதனப் பெட்டிகள் 3, படுக்கை வசதி பெட்டிகள் 6, இரண்டாம் வகுப்பு பெட்டிகள் 7 இணைக்கப்பட்டிருக்கும் எனத் தெரிவித்துள்ளாா்.