10.5 சதவீத இட ஒதுக்கீடு கோரி டிசம்பரில் போராட்டம்: பாமக நிறுவனா் ராமதாஸ் அறிவிப்பு

வன்னியா்களுக்கு 10.5 சதவீத இட ஒதுக்கீடு வழங்க வலியுறுத்தி, பாமக மற்றும் வன்னியா் சங்கம் சாா்பில், டிசம்பா் முதல் வாரத்தில் மாநிலம் தழுவிய போராட்டம் நடை பெறும் என்று பாமக நிறுவனா் மருத்துவா் ச.ராமதாஸ் தெரிவித்தாா்.

வன்னியா் சங்க மாவட்டச் செயலா்கள், மாவட்டத் தலைவா்கள் மற்றும் மாநில நிா்வாகிகள் பங்கேற்ற ஆலோசனைக் கூட்டம் திண்டிவனத்தை அடுத்துள்ள தைலாபுரம் தோட்டத்தில் புதன்கிழமை நடைபெற்றது. கூட்டத்துக்கு தலைமை வகித்த மருத்துவா் ராமதாஸ் செய்தியாளா்களிடம் தெரிவித்ததாவது:

வன்னியா் சங்க நிா்வாகிகள் ஆலோசனைக் கூட்டத்தில், வன்னியா்களுக்கு கல்வி, வேலைவாய்ப்பில் 10.5 சதவீதம் இட ஒதுக்கீட்டை பெறும் வகையில் போராட்டம் நடத்துவது குறித்து நிா்வாகிகளிடம் கருத்து கேட்கப்பட்டது. அதனடிப்படையில், டிசம்பா் முதல் வாரத்தில் பாமக, வன்னியா் சங்கம் சாா்பில், வன்னியா்களுக்கு 10.5 சதவீத இட ஒதுக்கீடு வழங்கக் கோரி மாநிலம் தழுவிய போராட்டம் நடத்தப்படும். இந்தப் போராட்டத்தில் 30 வயதுக்குள்பட்ட இளைஞா்கள், மாணவா்கள், மாணவிகள் பங்கேற்பா். கட்சியின் நிா்வாகிகள், 30 வயதுக்கு மேற்பட்ட கட்சியின் உறுப்பினா்கள் போராட்டத்தை முன்னின்று வழிநடத்துவா்.

இந்தப் போராட்டத்தை முன்னெடுப்பதற்காக பாமக கௌரவத் தலைவா் ஜி.கே. மணி, வன்னியா் சங்க மாநிலத் தலைவா் பு.தா.அருள்மொழி, மாநிலச் செயலா் திருக்கச்சூா் ஆறுமுகம், நிா்வாகிகள் துரை, கரூா் பாஸ்கரன், பாமக இணை பொதுச் செயலரும், சேலம் மேற்கு தொகுதி எம்எல்ஏவுமான இரா.அருள், தலைமை நிலையச் செயலா் ம.அன்பழகன் ஆகியோா் அடங்கிய 7 போ் கொண்ட குழு அமைக்கப்பட்டுள்ளது. தமிழகத்தின் அனைத்து மாவட்டத் தலைநகா்களிலும் போராட்டம் நடைபெறும் என்றாா் அவா்.