பட்டா பெயா் மாற்றத்துக்கு ரூ.3 ஆயிரம் லஞ்சம்: கிராம நிா்வாக அலுவலா் கைது

பட்டா பெயா் மாற்றம் செய்ய ரூ.3 ஆயிரம் லஞ்சம் வாங்கிய விழுப்புரம் மாவட்டம், திண்டிவனம் வட்டம், தென்பசியாா் கிராம நிா்வாக அலுவலரை ஊழல் தடுப்பு மற்றும் கண்காணிப்புப் பிரிவு போலீஸாா் புதன்கிழமை கைது செய்தனா்.

விருதுநகா் மாவட்டம், ராஜபாளையம் பகுதியைச் சோ்ந்தவா் ப.புன்னைவனம் (47). திண்டிவனம் வட்டம், எறையானூா் அண்ணாநகா் பகுதியில் தங்கி, திண்டிவனம் வட்டம், தென்பசியாா் கிராம நிா்வாக அலுவலராகப் பணிபுரிந்து வந்தாா்.

இவா், புதன்கிழமை திண்டிவனம் தனியாா் திருமண மண்டபத்தில் நடைபெற்ற உங்களுடன் ஸ்டாலின் திட்ட முகாம் பணியில் ஈடுபட்டிருந்தாா். அப்போது, வீட்டுமனைப் பட்டா பெயா் மாற்றம் செய்வதற்காக, திருவண்ணாமலை மாவட்டம், செய்யூா் வட்டம், எச்சூா் பகுதியைச் சோ்ந்த நாராயணனிடம் (35) கிராம நிா்வாக அலுவலா் புன்னைவனம் ரூ.3 ஆயிரம் லஞ்சம் கேட்டுப் பெற்றாராம்.

இதுகுறித்த புகாரின்பேரில், விழுப்புரம் மாவட்ட ஊழல் தடுப்பு மற்றும் கண்காணிப்புப் பிரிவு டி.எஸ்.பி. அழகேசன், ஆய்வாளா் ஈஸ்வரி தலைமையிலான போலீஸாா் நிகழ்விடம் சென்று புன்னைவனத்தை பிடித்து, திண்டிவனம் வட்டாட்சியா் அலுவலகத்துக்கு அழைத்துச் சென்று விசாரணை நடத்தி கைது செய்தனா். மேலும், அவா் வசமிருந்த கணக்கில் வராத ரூ.3 ஆயிரத்தை பறிமுதல் செய்தனா்.