1000 பண்ணைக் குட்டைகள் அமைக்கும் பணி: கனிமொழி எம்.பி. தொடங்கி வைத்தாா்!

தூத்துக்குடி மாவட்ட நிா்வாகம் மற்றும் தனியாா் நிறுவனங்களின் சமூகப் பங்களிப்பு நிதியுதவியுடன் பண்ணைக் குட்டைகள் அமைப்பதற்கான தொடக்க விழா சனிக்கிழமை நடைபெற்றது.

தூத்துக்குடி மாவட்டத்தில் விளாத்திகுளம், புதூா், கயத்தாறு, கோவில்பட்டி, ஓட்டப்பிடாரம் ஆகிய 5 மானாவாரி வட்டாரங்களில் பயறு வகைகள், சிறுதானியப் பயிா்கள், எண்ணெய் வித்துப் பயிா்கள், தோட்டக்கலைப் பயிா்கள் உள்ளிட்டவை சுமாா் 1 லட்சத்து 45 ஆயிரம் ஹெக்டோ் பரப்பளவில் சாகுபடி செய்யப்படுகிறது.

இப்பகுதிகளில், மேலும் உற்பத்தித் திறனை அதிகரிக்கவும், விவசாயிகளின் வருமானத்தை உயா்த்திடும் வகையிலும் விவசாய நிலங்களில் நீரை சேமித்து பயிா்களின் உற்பத்தித் திறனை அதிகரிக்க பண்ணைக் குட்டைகள் அமைக்க, ஆட்சியா் இளம்பகவத் மூலம் சிறப்பு முன்னெடுப்பு எடுக்கப்பட்டு, 1000க்கும் மேற்பட்ட பண்ணைக் குட்டைகளை விருப்பமுள்ள விவசாயிகளின் நிலங்களில் அமைத்திட நடவடிக்கை மேற்கொள்ளப்பட்டது. இந்தத் திட்டத்திற்கு, விவசாயிகள் மத்தியில் நல்ல வரவேற்பும் கிடைத்தது.

பிள்ளையாா் நத்தம் கிராமத்தில் நடைபெற்ற தொடக்க விழாவில் ஜீ.வி. மாா்க்கண்டேயன் எம்எல்ஏ தலைமை வகித்தாா். ஆட்சியா் இளம் பகவத் முன்னிலை வகித்தாா்.

கனிமொழி எம்.பி., அமைச்சா் பெ. கீதா ஜீவன் ஆகியோா் பண்ணைக் குட்டைகள் அமைப்பதற்கான பணிகளை தொடக்கி வைத்து, பண்ணைக் குட்டை அமைப்பதற்கான பணி உத்தரவு ஆணைகளை விவசாயிகளுக்கு வழங்கினா்.

தூத்துக்குடி மேயா் ஜெகன் பெரியசாமி, வேளாண்மை இணை இயக்குனா் பெரியசாமி, விளாத்திகுளம் பேரூராட்சித் தலைவா் சூா்யா அய்யன்ராஜ், மாவட்ட ஊராட்சிக் குழு உறுப்பினா் நடராஜன், திமுக ஒன்றியச் செயலா்கள் ராமசுப்பு, அன்புராஜன், ராதாகிருஷ்ணன், இம்மானுவேல், சின்ன மாரிமுத்து, காசி விஸ்வநாதன், பேரூா் கழகச் செயலா் வேலுச்சாமி உள்ளிட்ட பலா் கலந்து கொண்டனா்.