12 கிலோ கஞ்சா பறிமுதல்: பெண் கைது

பல்லடம் அருகே கஞ்சா விற்பனையில் ஈடுபட்ட பெண்ணைக் கைது செய்த போலீஸாா், அவரிடமிருந்த 12 கிலோ கஞ்சாவைப் பறிமுதல் செய்தனா்.

பல்லடம் காவல் நிலைய எல்லைக்குள்பட்ட கவுண்டம்பாளையம் வட்டாங்காட்டுத் தோட்டம் பகுதியில் கஞ்சா விற்பனை செய்யப்படுவதாக போலீஸாருக்கு ரகசியத் தகவல் கிடைத்தது.

இதையடுத்து, உதவி ஆய்வாளா் கோவிந்தராஜ் தலைமையிலான போலீஸாா் சம்பவ இடத்தில் ஆய்வு மேற்கொண்டனா்.

அப்போது, அங்கிருந்த ஒரு வீட்டில் மேற்கொண்ட சோதனையில், விற்பனைக்காக 12 கிலோ கஞ்சா பதுக்கிவைக்கப்பட்டிருந்தது தெரியவந்தது.

வீட்டில் இருந்த பெண்ணிடம் மேற்கொண்ட விசாரணையில், அவா் மத்திய பிரதேசத்தைச் சோ்ந்த உஷா (50) என்பதும், ஒடிஸாவில் இருந்து கஞ்சாவை வாங்கி வந்து விற்பனையில் ஈடுபட்டதும் தெரியவந்தது.

இதையடுத்து, உஷாவைக் கைது செய்த போலீஸாா், அவரை நீதிமன்றத்தில் ஆஜா்படுத்தி கோவை மத்திய சிறையில் அடைத்தனா்.