3,33,062 குடும்ப அட்டைதாரா்களுக்கு பொங்கல் பரிசுத் தொகுப்பு: திருப்பத்தூா் ஆட்சியா்

திருப்பத்தூா் மாவட்டத்தில் 601 நியாயவிலைக் கடைகளில் 3,33,062 குடும்ப அட்டைதாரா்களுக்கு பொங்கல் பரிசுத் தொகுப்பு விநியோகம் வழங்கப்பட உள்ளதாக ஆட்சியா் க.தா்ப்பகராஜ் தெரிவித்தாா்.

முதல்வா் மு.க.ஸ்டாலின் பொங்கல் பரிசுத் தொகுப்பை வழங்கி, நிகழ்ச்சியை தொடங்கி வைத்தாா். அதன் தொடா்ச்சியாக திருப்பத்தூா் மாவட்டத்தில் ஆட்சியா் க.தா்ப்பகராஜ் மாடப்பள்ளி தொடக்க வேளாண்மை கூட்டுறவு நியாயவிலைக் கடையில் பொங்கல் பரிசுத் தொகுப்பை வழங்கி தொடங்கி வைத்தாா்.

பின்னா், செய்தியாளா்களிடம் ஆட்சியா் கூறியது:

திருப்பத்தூா் மாவட்டத்தில் உள்ள 601 நியாயவிலைக் கடைகளில் 3,33,062 குடும்ப அட்டைதாரா்களுக்கு ஏற்கெனவே டோக்கன் வழங்கி எந்தெந்த நாள்களில் பொங்கல் பரிசுத் தொகுப்பு பெற்றுக் கொள்ளலாம் என்று அறிவிப்பு தரப்பட்டுள்ளது.

இதில், ஒரு கிலோ பச்சரிசி, ஒரு கிலோ சா்க்கரை, ஒரு முழுக் கரும்பு மற்றும் இலவச வேட்டி, சேலை ஆகியவை தொகுப்பாக வழங்கப்படுகின்றன.

33,945 கரும்புகள் மட்டும் திருப்பத்தூா் மாவட்டத்தில் விவசாயிகளிடமிருந்து கொள்முதல் செய்யப்பட்டுள்ளது. மீதமுள்ள 2,99,117 கரும்புகள் வெளி மாவட்டமான கடலூா் மாவட்டத்திலிருந்து கொள்முதல் செய்யப்பட்டு, அனைத்து நியாயவிலைக் கடைகளுக்கும் விநியோகம் செய்யப்பட்டுள்ளது. இந்த பொங்கல் பரிசுத் தொகுப்பு விநியோகம் வரும் 13-ஆம் தேதிக்குள் அனைத்து குடும்ப அட்டைதாரா்களுக்கும் வழங்க ஏற்பாடு செய்யப்பட்டுள்ளது என்றாா்.

நிகழ்ச்சியில், கூட்டுறவு சங்கங்களின் இணைப்பதிவாளா் பாலகிருஷ்ணன்,திருப்பத்தூா் ஒன்றியக் குழு தலைவா் விஜயா, மாவட்ட வழங்கல் மற்றும் நுகா்வோா் பாதுகாப்பு அலுவலா் சாந்தி மற்றும் உள்ளாட்சிப் பிரதிநிதிகள் கலந்து கொண்டனா்.