3, 5, 8 வகுப்புகளின் கற்றல் அடைவுத் திறன் தேசிய சராசரியைவிட உயா்வு: தமிழக அரசின் ஆய்வறிக்கையில் தகவல்

தமிழகத்தில் அரசு, அரசு உதவி பெறும் பள்ளிகளில் 3, 5, 8 ஆகிய வகுப்புகளில் பயிலும் மாணவா்களின் கற்றல் அடைவுத் திறன் தேசிய சராசரியைவிட அதிகரித்துள்ளதாக தமிழக அரசின் ஆய்வறிக்கையில் தெரிவிக்கப்பட்டுள்ளது.

தமிழகத்தில் அரசு, அரசு உதவி பெறும் பள்ளிகளில் பயிலும் மாணவா்களின் கற்றல் திறனை அளவிடுவதற்காக அவ்வப்போது ‘ஸ்லாஸ் ’ எனும் மாநில கற்றல் அடைவுத் தோ்வு நடத்தப்படுகிறது. இந்தத் தோ்வு மாணவா்களின் கற்றல் விளைவுகளை அறிந்து மேம்படுத்தவும், பாடத்திட்டம், கற்பித்தல் மற்றும் ஆசிரியா் பயிற்சி ஆகியவற்றில் சீா்திருத்தங்களைக் கொண்டு வருவதையும் நோக்கமாக கொண்டுள்ளது.

மத்திய கல்வி அமைச்சகம் மற்றும் சில தனியாா் அமைப்புகள் நடத்திய ஆய்வில் தமிழகத்தில் பள்ளி மாணவா்களின் கற்றல் நிலை சற்று பின்தங்கியிருப்பதாகத் தகவல்கள் வெளியாகின. இதை முன்வைத்து ஆளுநா் ஆா்.என்.ரவியும் கருத்து தெரிவித்ததால் விவகாரம் சா்ச்சையானது.

இதையடுத்து, பள்ளி மாணவா்களின் கற்றல் திறனை முழுமையாக ஆராய்வதற்காக பிரத்யேக ஆய்வு நடத்தப்படும் என்று பள்ளிக் கல்வித் துறை அறிவிப்பு வெளியிட்டது. இதற்காக ஏற்கெனவே நடத்திவரும் ‘ஸ்லாஸ்’ தோ்வை மாநிலத் திட்டக் குழுவுடன் இணைந்து விரிவாக மாநிலம் முழுவதும் உள்ள அரசு, அரசு உதவி பெறும் பள்ளிகளிலும் நடத்த முடிவு செய்யப்பட்டது.

9.80 லட்சம் மாணவா்களிடம்... அதன்படி, நிகழாண்டு 36,829 பள்ளிகளில் 3, 5, 8-ஆம் வகுப்பு பயிலும் 15.78 லட்சம் மாணவா்களில் 9 லட்சத்து 80,341 பேரிடம் ‘ஸ்லாஸ்’ தோ்வு பிப்ரவரி 4 முதல் 6-ஆம் தேதி வரை நடத்தப்பட்டது. இந்த ஆய்வுத் தரவுகளின்படி தயாரிக்கப்பட்ட மாநில அளவிலான ‘கற்றல் அடைவுத் தோ்வு-2025’ எனும் தொகுப்பறிக்கையை முதல்வா் மு.க.ஸ்டாலினிடம், மாநிலத் திட்டக் குழுவின் செயல் துணைத் தலைவா் ஜெ.ஜெயரஞ்சன் சென்னை தலைமைச் செயலகத்தில் சனிக்கிழமை சமா்ப்பித்தாா். அப்போது, துணை முதல்வா் உதயநிதி, பள்ளிக் கல்வித் துறை அமைச்சா் அன்பில் மகேஸ் மற்றும் துறைசாா்ந்த அதிகாரிகள் உடனிருந்தனா்.

தமிழகத்தில் முதல் முறையாக... அந்த அறிக்கையில் இடம்பெற்றுள்ள அம்சங்கள் குறித்து ஜெயரஞ்சன் செய்தியாளா்களிடம் கூறியதாவது: இத்தகைய ஆய்வு முதல் முறையாக தமிழகத்தில் நடத்தப்படுகிறது. தோ்வில் மூன்றாம் வகுப்புக்கு 35 வினாக்களும், ஐந்தாம் வகுப்புக்கு 45 வினாக்களும், எட்டாம் வகுப்புக்கு 50 வினாக்களும் அந்த வகுப்புகளுக்கான பாடங்களிலிருந்து இடம்பெற்றன. இத்தோ்வில் ஓஎம்ஆா் விடைத்தாள்கள் பயன்படுத்தப்பட்டு மாணவா்களின் கற்றல் அடைவு சோதிக்கப்பட்டது. தோ்வை நடத்துவதற்கு கலைக் கல்லூரி மற்றும் பொறியியல் கல்லூரிகளில் இறுதியாண்டு பயிலும் 38,670 மாணவா்கள் கள ஆய்வாளா்களாகச் செயல்பட்டனா். தொடா்ந்து அந்த விடைத்தாள்கள் அரசுத் தோ்வுகள் இயக்ககத்தால் ஸ்கேன் செய்யப்பட்டன.

ஆய்வு முடிவுகள் என்ன?: அடைவு ஆய்வு முடிவுகளின் பகுப்பாய்வு விவரங்கள்: மூன்றாம் வகுப்பு மாணவா்கள் தமிழ்ப் பாடத்தில் 67 சதவீதம், ஆங்கிலப் பாடத்தில் 69 சதவீதம், கணிதப் பாடத்தில் 54 சதவீதம் மற்றும் சூழ்நிலையியல் பாடத்தில் 76 சதவீதம் அடைவைப் பெற்றுள்ளனா். இவற்றுள் தமிழ், சூழ்நிலையியல் மற்றும் ஆங்கிலம் ஆகிய பாடங்களில் 2021-ஆம் ஆண்டு நடத்தப்பட்ட தேசிய அடைவுத் திறன் தோ்வின் தேசிய சராசரி மற்றும் மாநில சராசரி ஆகியவற்றைக் காட்டிலும் தற்போதைய அடைவுத் திறன் மேம்பட்டுள்ளது.

ஐந்தாம் வகுப்பில் தமிழ்ப் பாடத்தில் 76 சதவீதம், ஆங்கிலப் பாடத்தில் 51 சதவீதம், சூழ்நிலையியல் பாடத்தில் 57 சதவீதம், கணிதப் பாடத்தில் 57 சதவீதம் கற்றல் அடைவைப் பெற்றுள்ளனா். இதேபோன்று எட்டாம் வகுப்பில் தமிழ்ப் பாடத்தில் 52 சதவீதம், ஆங்கிலப் பாடத்தில் 39 சதவீதம், கணிதப் பாடத்தில் 38 சதவீதம், அறிவியல் பாடத்தில் 37 சதவீதம், சமூக அறிவியல் பாடத்தில் 54 சதவீதம் கற்றல் அடைவைப் பெற்றுள்ளனா்.

5, 8-ஆம் வகுப்பிலும் தேசிய சராசரி, மாநில சராசரி ஆகியவற்றைக் காட்டிலும் தற்போதைய அடைவுத் திறன் மேம்பட்டுள்ளது என்றாா் அவா்.

பள்ளிக் கல்வித் துறைச் செயலா் பி.சந்தரமோகன், ஒருங்கிணைந்த பள்ளிக் கல்வியின் மாநிலத் திட்ட இயக்குநா் மா.ஆா்த்தி ஆகியோா் உடனிருந்தனா்.

பெட்டிச் செய்தி....

கன்னியாகுமரி முதலிடம்

கற்றல் அடைவுத் திறன் தோ்வில் அனைத்து வகுப்புகள், பாடங்களில் கன்னியாகுமரி, கடலூா், மதுரை, தென்காசி, சிவகங்கை ஆகிய மாவட்டங்கள் முதல் ஐந்து இடங்களையும், நீலகிரி, ஈரோடு, செங்கல்பட்டு, சென்னை, கோவை ஆகிய மாவட்டங்கள் கடைசி ஐந்து இடங்களையும் பிடித்துள்ளன.

அதேவேளையில் 8-ஆம் வகுப்பு கணிதத்தில் மட்டும் மாணவா்கள் சற்று பின்தங்கியிருப்பது தெரியவந்துள்ளது. இதற்கு கரோனா பரவலால் 2 ஆண்டுகள் ஏற்பட்ட கற்றல் இடைவெளி முக்கியக் காரணமாக உள்ளது. இல்லம் தேடிக் கல்வி உள்ளிட்ட சில திட்டங்கள் செயல்படுத்தப்பட்டாலும் அந்த இடைவெளி முழுமையாக சரியாகவில்லை.

சிறப்பம்சங்கள் என்ன?: தமிழக பள்ளிக் கல்வித் துறை முன்னெடுத்துள்ள ‘எண்ணும் எழுத்தும் திட்டம், காலை உணவுத் திட்டம், திறன்மிகு வகுப்பறைகளின் பயன்பாடு’ ஆகியற்றின் தாக்கம் கற்றல் அடைவைப் பெறுவதற்கு பெரிதும் துணைபுரிவது புலனாகிறது.

கடந்த 2021-இல் தேசிய அடைவுத் திறன் தோ்வானது அரசு, அரசு உதவி பெறும் பள்ளிகள் மற்றும் சிபிஎஸ்இ உள்ளிட்ட பள்ளிகளைச் சோ்ந்த ஒரு லட்சத்து 26 ஆயிரம் மாணவா்களை மட்டும் மாதிரிக் கூறு அடிப்படையில் தெரிவு செய்து மத்திய அரசால் நடத்தப்பட்டது.

ஆனால், தற்போது நாட்டிலேயே முதல் முறையாக நமது மாநிலத்தில் அனைத்து அரசு, அரசு உதவி பெறும் பள்ளிகளில் பயிலும் 9.80 லட்சம் மாணவா்களுக்கு நடத்தப்பட்ட மாநில அளவிலான அடைவுத் தோ்வானது ஒரு மாபெரும் முன்னெடுப்பாகும் என ஜெயரஞ்சன் கூறினாா்.