BB Tamil 8: அன்று ஒரு பேட்டிக்காக சிறை வாசலில்..! - முத்துக்குமரன் வாழ்வில் சம்பவம் செய்த காலம்

அதிசயங்களை நிகழ்த்தவல்லது காலம். சிலர் அந்த அதிசயங்களுக்காக நெடுநாள் காத்திருக்க வேண்டி வரலாம். சிலருக்குத் தூங்கி எழும் நேரத்திலும் அதிசயங்கள் அரங்கேறியிருக்கும்.

சுவாரஸ்யமான ஒரு அதிசயக் கதை பார்க்கலாமா?

இரண்டு வருடங்களுக்கு முன் புழல் மத்தியச் சிறையின் வாசலில் ஒரு பிரபலத்திடம் பேட்டி வாங்கக் காத்திருந்த போது, அந்த இளைஞன் நினைத்துக்கூடப் பார்த்திருக்க மாட்டான், வெகு விரைவிலேயே அதே பிரபலத்துடன் போட்டி போடுபவனாக தான் மாறப் போவதையும், அந்தப் பந்தயத்தில் ’பேசுவாரா’ எனக் காத்திருந்த அந்தப் பிரபலம் பின்னுக்குத் தள்ளப்பட்டு, வெற்றி தனக்குக் கிட்டும் என்பதையும்.

2022 ம் ஆண்டு அக்டோபர் மாதத்தின் ஒரு மாலைப் பொழுதில் புழல் சிறையில் இருந்து வெளியில் வந்த அந்த செலிபிரிட்டியைப் பேட்டி எடுக்க ஒரு யூ டியூபராக சிறை வாசலில் காத்துக்கிடந்த அந்த இளைஞன், பிக்பாஸ் சீசன் 8 ன் டைட்டில் வின்னர் முத்துக்குமரன்.

சிறையில் இருந்து ஜாமீனில் வெளியில் வந்த அந்த செலிபிரிட்டி, மனைவி கொடுத்த புகாரில் கைதான அர்னவ்.

’அட, ஆமாங்க, அர்னவுக்கும் அவர் மனைவி திவ்யாவுக்குமிடையில் பிரச்னை உண்டாகி அர்னவ் கைது செய்யப்பட்டு சிறைக்குள் போன போது, முதல்ல திவ்யாகிட்ட பேட்டி எடுத்திருந்தார் முத்துக்குமரன். அந்தப் பேட்டியில் திவ்யா அர்னவ் மீது பல குற்றச்சாட்டுகளைக் கூறியிருந்தாங்க, அந்தப் பேட்டி வெளிவந்த அடுத்த சில நாட்கள்ல அர்னவுக்கு ஜாமீன் கிடைச்சிடுச்சு.

அந்தச் சமயத்துல எல்லா மீடியாவிலயும் இவங்க பிரச்னை போய்க் கொண்டிருந்ததால், அர்னவைப் பேட்டி எடுக்க சில யூ டியூப் சேனல்கள் சிறை வாசலுக்கே போயிருந்தாங்க. அப்படிப் போய் காத்துக்கிடந்த ஆங்கர்களில் முத்துக்குமரனும் ஒருவர்.

அந்த இடத்துல வச்சு அர்னவ் கிட்ட அவர் பேசினாலும் உடனேயே அந்த பேட்டி நிகழவில்லை. ஆனா அடுத்த நாள் அந்த இண்டர்வியூவை எடுத்தார்.

ரெண்டே வருஷத்துல இப்படியொரு மீட் அர்னவ் கூட வரும்னு நினைச்சே பார்த்திருக்க மாட்டார் முத்து’’ என்கின்றனர் மேற்படி சம்பவத்தின் போது முத்துவுடன் இருந்த அவரது நண்பர்கள் சிலர்.

’ஆனா, அர்னவ், அன்ஷிதா ரெண்டு பேரையும் தெரிஞ்ச மாதிரி கூட அவர் காட்டிக்கலையே, தவிர அவங்க பிரச்னை குறித்து சக போட்டியாளர்கிட்டக் கூட எதுவும் பேசின மாதிரி தெரியலையே’ என்றோம்.

’அதெல்லாம் விளையாட்டின் ஒரு உத்தியாகக் கூட இருக்கலாம் இல்லையா’ என்கின்றனர் அவர்கள்.