Kangana Ranaut: ``பாலிவுட்டை ஆளும் 3 கான்களை வைத்து இயக்க தயார்'' - கங்கனா ரனாவத்

எப்போதும் சர்ச்சைகளுக்கு புகழ்பெற்ற நடிகை கங்கனா ரனாவத் புதிதாக எமர்ஜென்சி என்ற படத்தில் நடித்து தயாரித்து இருக்கிறார். இப்படத்தில் கங்கனா மறைந்த முன்னாள் பிரதமர் இந்திரா காந்தியாக நடித்திருக்கிறார். இப்படம் சென்சார் போர்டு பிடியில் சிக்கி இருந்தது. கடந்த செப்டம்பர் 8-ம் தேதி படம் வெளியாக இருந்தது. நீண்ட இழுபறிக்கு பிறகுதான் படத்திற்கு ஒப்புதல் கிடைத்திருக்கிறது.

மிகுந்த பொருள் செலவில் இப்படத்தை தயாரித்துள்ள கங்கனா ரனாவத் இப்படத்திற்காக வாங்கிய கடனுக்காக தனது மும்பை வீட்டை விற்பனை செய்துவிட்டார். இப்போது படம் வரும் 17-ம் தேதி வெளியாக இருக்கிறார். சமீப காலமாக கங்கனா நடித்த படங்கள் சரியாக போகவில்லை. எனவே, எமர்ஜென்சி படமும் தோல்வி அடைந்ததால் கங்கனாவிற்கு பெரிய பின்னடைவாக அமையும். எனவே எமர்ஜென்சி படத்திற்கு மிகப்பெரிய எதிர்பார்ப்பு எழுந்துள்ளது.

கங்கனா ரனாவத் பாலிவுட்டில் எதிர்காலத்தில் யாரை இயக்குவது என்பது தொடர்பாக அளித்த பேட்டி ஒன்றில், பாலிவுட்டில் ஆதிக்கம் செலுத்தும் மூன்று கான்களையும் இயக்க வாய்ப்பு கிடைத்தால் சரியான கதை அமைந்தால் அவர்களை இயக்க தயாராக இருக்கிறேன். அவர்களிடம் நல்ல திறமை இருக்கிறது'' என்று தெரிவித்தார்.

கரண் ஜோகரின் தயாரிப்பில் நீங்கள் நடிப்பீர்களா என்று கேட்டதற்கு, ''அதற்கு வாய்ப்பு இல்லை. ஆனால் அவர் என்னுடன் சேர்ந்து நடித்தால் அவருக்கு நல்ல கதாபாத்திரம் கொடுக்க தயாராக இருக்கிறேன். என்னால் நல்ல படம் தயாரிக்க முடியும். அது மாமியார் மருமகள் சண்டையை கொண்டதாக இருக்காது என்று தெரிவித்தார்.

இதற்கு முன்பு கங்கனா ரனாவத் கடந்த 2017-ம் ஆண்டு காபி வித் கரண் நிகழ்ச்சியில் கலந்து கொண்டபோது, எனது வாழ்க்கை வரலாற்றை படமாக எடுத்தால் அதில் கரண் ஜோகரை வில்லனாக பார்க்க விரும்புகிறேன்'' என்று தெரிவித்திருந்தார்.

தற்போது கரண் ஜோகருக்கும், கங்கனா ரனாவத்திற்கும் இடையே உறவு சரியில்லாமல் இருக்கிறது. ஆனால் சல்மான் கான், ஷாருக்கான், ஆமீர்கானுடன் கங்கனா சுமூக உறவை பேணி வருகிறார். சமீபத்தில் தனது படத்தை விளம்பரப்படுத்த சல்மான் கானின் பிக்பாஸ் நிகழ்ச்சியில் கங்கனா கலந்து கொண்டார். அதோடு ஷாருக்கான் மகன் ஆர்யன் கானையும் சமீபத்தில் புகழ்ந்து தள்ளினார்.