Rahul Gandhi: `ராகுல் காந்தியின் இங்கிலாந்து குடியுரிமை!?'; விசாரித்து பதிலளிக்க நீதிமன்றம் உத்தரவு!

மக்களவை எதிர்க்கட்சித் தலைவர் ராகுல் காந்தியின் குடியுரிமையை ரத்து செய்யக்கோரி அலாகாபாத் உயர் நீதிமன்றத்தில் கர்நாடகாவைச் சேர்ந்த பா.ஜ.க நிர்வாகி எஸ்.விக்னேஷ் ஷிஷிர் என்பவர் பொதுநல வழக்கு தாக்கல் செய்தார். அந்த மனுவில், ``ராகுல் பிரிட்டிஷ் குடிமகன் என்பதற்கான ஆதாரம் என்னிடம் இருக்கிறது. ராகுல் காங்கிரஸ் தலைவர் தேர்தலில் போட்டியிட தகுதியற்றவர். இந்த விவகாரம் தொடர்பாக பிரிட்டிஷ் அரசிடமிருந்து வந்த ரகசிய மின்னஞ்சல்களும் இருக்கிறது. இது குறித்து உரிய அதிகாரிகளிடம் இருமுறை புகார் அளித்தும் முறையான நடவடிக்கை எடுக்கவில்லை" எனக் குறிப்பிடப்பட்டிருக்கிறது.

இது தொடர்பான விசாரணை நடந்துவரும் நிலையில், இந்த மனு மீது மத்திய அரசு பதிலளிக்க வேண்டும் என நீதிமன்றம் கேட்டிருந்தது. இந்த நிலையில், மத்திய உள்துறை அமைச்சகம் சார்பில் ஆஜரான துணை சொலிசிட்டர் ஜெனரல் எஸ்.பி.பாண்டே, ``சம்மந்தப்பட்ட நபரின் புகார் மத்திய உள்துறை அமைச்சகத்திற்கு வந்துள்ளது. அது தொடர்பாகப் பரிசீலித்து வருகிறோம்." என்றார்.

இதைத் தொடர்ந்து பேசிய நீதிபதி அட்டாவ் ரஹ்மான் மசூதி, நீதிபதி சுபாஷ் வித்யார்த்தி, ``அடுத்த விசாரணைக்குள் உள்துறை அமைச்சகத்திடமிருந்து உரியப் பதிலைப் பெற்றுத் தரவேண்டும். இந்த வழக்கு விசாரணை மூன்று வாரங்களுக்கு ஒத்திவைக்கப்படுகிறது. மனு தாரரின் புகாரைப் பெற்று உள்துறை அமைச்சகம் செயல்பட்டதா என்பது குறித்து மட்டுமே விசாரணையில் கவனம் செலுத்தி வருகிறோம். இந்த வழக்கின் அடுத்த விசாரணையை அடுத்த மாதம் 19-ம் தேதிக்கு ஒத்திவைக்கப்படுகிறது" எனக் குறிப்பிட்டிருக்கிறார்கள்.

இந்த உத்தரவு தொடர்பாக பா.ஜ.க நிர்வாகி எஸ்.விக்னேஷ் ஷிஷிர் தனியார் செய்தி நிறுவனத்துக்கு அளித்தப் பேட்டியில், ``இந்த விவகாரத்தில் அடுத்த விசாரணை நாளான டிசம்பர் 19-ம் தேதிக்குள் தெளிவான மற்றும் இறுதி முடிவை எடுக்க வேண்டும் என்று மத்திய அரசுக்கு நீதிமன்றம் உத்தரவிட்டுள்ளது. உள்துறை அமைச்சகமும் தனது விசாரணை முடிவுகளை நீதிமன்றத்திற்கு தெரிவிக்க வேண்டும். ராகுல் காந்தியின் இந்திய குடியுரிமையை அரசு உடனடியாக ரத்து செய்யும் என்று நான் நம்புகிறேன். இங்கிலாந்து குடியுரிமைப் பதிவேடுகளில் ராகுல் காந்தியின் பெயர் இருப்பதாக இங்கிலாந்து அரசிடமிருந்து எங்களுக்கு நேரடித் தகவல் கிடைத்துள்ளது" எனக் குறிப்பிட்டிருக்கிறார்.

அமெரிக்கா உள்ளிட்ட நாடுகள் இரட்டை குடியுரிமையை சட்டப்பூர்வமாக அனுமதித்தாலும் இந்தியச் சட்டம் அதை அனுமதிப்பதில்லை. ஒருவர் வேறு ஒரு நாட்டின் குடியுரிமையைப் பெற விரும்பினால், அவர் இந்தியக் குடியுரிமையைத் துறக்க வேண்டும். இந்தியக் குடியுரிமை பெற்ற ஒருவர் வேறு ஒரு குடியுரிமையைப் பெற முடியாது என்பது குறிப்பிடதக்கது.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/ParthibanKanavuAudioBook