ஃபென்ஜால் புயலால் பாதிக்கப்பட்ட மாவட்டங்களுக்கு நிவாரணப் பொருள்கள்: வணிகா் சங்கத்தினா் ஏற்பாடு

ஃபென்ஜால் புயலால் பாதிக்கப்பட்ட மாவட்டங்களுக்கு நிவாரணப் பொருள்களை அனுப்ப வணிகா்கள் முன்வர வேண்டும் என தமிழ்நாடு வணிகா் சங்கங்களின் பேரமைப்பின் மாவட்டத் தலைவா் ஜெயக்குமாா் வெள்ளையன் வேண்டுகோள் விடுத்துள்ளாா்.

இது குறித்து அவா் வெளியிட்ட அறிக்கை:

தமிழகத்தில் ஃபென்ஜால் புயலாலும், பலத்த மழையாலும், சென்னை, செங்கல்பட்டு, மயிலாடுதுறை, திருவாரூா், நாகப்பட்டினம், கடலூா், திருவண்ணாமலை, விழுப்புரம், கள்ளக்குறிச்சி, தருமபுரி, கிருஷ்ணகிரி, சேலம் உள்ளிட்ட மாவட்டங்கள் பாதிக்கப்பட்டுள்ளன.

இந்த மாவட்டங்களில் உள்ள மக்களுக்கு தேவையான நிவாரணப் பொருட்கள் அனுப்பும் பணியில், நாமக்கல் மாவட்ட நிா்வாகம், காவல் துறை ஈடுபட்டுள்ளது. அந்த மக்களுக்கு உதவிக்கரம் நீட்ட வணிகா்கள் அனைவரும் முன்வர வேண்டும்.

நிவாரணப் பொருள்கள் வழங்க விரும்பும் சங்கத்தினா், வணிக நிறுவனத்தினா், மாவட்ட பேரமைப்பை தொடா்பு கொள்ளலாம். நிவாரணப் பொருள்களை வழங்குவோா் தங்களது பெயா், வணிக நிறுவன முகவரி, கைப்பேசி எண்ணை குறிப்பிட்டு அனுப்ப வேண்டும். குறிப்பாக, வெங்காயம் - 100 கிலோ, தக்காளி - 100 கிலோ, கேரட்- 50 கிலோ, பீன்ஸ் - 30 கிலோ, உருளைக்கிழங்கு - 50 கிலோ, பச்சை பட்டாணி - 10 கிலோ, பச்சை மிளகாய் - 6 கிலோ, பூண்டு - 5 கிலோ, காய்ந்த மிளகாய் - 3 கிலோ, கறிவேப்பிலை-5 பெரியகட்டு, கொத்தமல்லி - 5 பெரிய கட்டு உள்ளிட்ட வகை காய்கறிகளை நாமக்கல் நகர தினசரி காய்கறி விற்பனை வியாபாரிகள் சங்கத்தினா் வழங்க உள்ளனா்.

இவை தவிர, 7,500 முதல் 10,000 பேருக்கு உணவு வழங்க அரிசி - 500 கிலோ, துவரம் பருப்பு - 60 கிலோ, எண்ணெய் 50 லிட்டா், நெய் 10 கிலோ, மிளகாய் தூள் 5 கிலோ, மல்லித் தூள் - 15 கிலோ, மஞ்சள் தூள்- 1 கிலோ, கடுகு கலப்பு - 2 கிலோ, வெந்தயம் - 1 கிலோ, உளுத்தம் பருப்பு -3 கிலோ உள்ளிட்ட மளிகைப் பொருள்கள் அவசரமாகத் தேவைப்படுகின்றன.

இதனை வழங்க வணிகா்கள் முன்வர வேண்டும். புயல், மழை பேரிடா் காலங்களில் பாதிக்கப்படும் மக்களுக்கு, தாமாக முன்வந்து உதவும் குணம் கொண்டவா்களாக வணிகா்கள் விளங்குகின்றனா். தற்போது ஃபென்ஜால் புயலால் பாதிக்கப்பட்ட மக்களுக்கும் மாவட்ட வணிகா்கள் உதவிட வேண்டும் என தெரிவித்துள்ளாா்.