ஃபென்ஜால் புயல் நிவாரண நிதியை மத்திய அரசு வழங்க வேண்டும்: மாா்க்சிஸ்ட் மாநிலச் செயலா் பி.சண்முகம்

ஃபென்ஜால் புயல் பாதிப்புகளை மத்தியக் குழு மதிப்பீடு செய்து 3 மாதங்கள் கடந்த நிலையில், தமிழகத்துக்கான நிவாரண நிதியை மத்திய அரசு உடனடியாக வழங்க வேண்டும் என்று மாா்க்சிஸ்ட் கம்யூனிஸ்ட் மாநிலச் செயலா் பி.சண்முகம் தெரிவித்தாா்.

கடலூரில் செவ்வாய்க்கிழமை செய்தியாளா்களிடம் அவா் கூறியதாவது: ஃபென்ஜால் புயல், மழையால் பாதிக்கப்பட்ட கடலூா், விழுப்புரம், கள்ளக்குறிச்சி, திருவண்ணாமலை ஆகிய மாவட்டங்களில் மத்தியக் குழுவினா் ஆய்வு செய்து மூன்று மாதங்கள் கடந்த நிலையில், தற்போது வரை மத்திய அரசு பேரிடா் நிவாரணம் வழங்கவில்லை. எனவே, தமிழக அரசு கோரிய ரூ.37 ஆயிரம் கோடியை மத்திய அரசு வழங்க வேண்டும். தமிழக அரசு சொந்த நிதியில் ரூ.500 கோடியை பாதிக்கப்பட்ட பயிா்களுக்கு நிவாரணமாக விவசாயிகளுக்கு வழங்கியுள்ளது.

கடந்த சட்டப்பேரவைத் தோ்தலில் திமுக அளித்த வாக்குறுதியான நெல் குவிண்டாலுக்கு ரூ.2,500, கரும்புக்கு டன் ஒன்றுக்கு ரூ.4,000 வழங்குவது என்ற வாக்குறுதியை தற்போது வரை தமிழக அரசு நிறைவேற்றாதது விவசாயிகள் மத்தியில் அதிருப்தியை ஏற்படுத்தியுள்ளது.

முத்தரப்பு கூட்டத்தில் ஏற்றுக்கொண்டதன்படி, மரவள்ளி விலையை தீா்மானிக்க வேண்டும். இந்த விலையை கொடுக்க மறுக்கும் ஆலை மீது நடவடிக்கை எடுக்க வேண்டும். கடலூா் வட்டத்தில் மலையடிகுப்பம், கொடுக்கம்பாளையம், பெத்தநாயக்கன்குப்பம் கிராமங்களைச் சோ்ந்த விவசாயிகளுடைய 10,000 முந்திரி மரங்களை மாவட்ட நிா்வாகம் அழித்துள்ளது. இங்கு தோல் தொழிற்சாலை அமைக்க இருக்கும் முடிவை அரசு கைவிட வேண்டும்.

இந்த விவகாரத்தில் மாவட்ட நிா்வாகம் சுமுகமான முடிவு எடுக்கவில்லையெனில், மாா்ச் 9-ஆம் தேதி தமிழ்நாடு விவசாய சங்கம் சாா்பில் நிலம் மீட்கும் போராட்டம் நடத்தப்படும். ஜாக்டோ-ஜியோ அமைப்பின் முக்கிய கோரிக்கையான பழைய ஓய்வூதியத் திட்டத்தை நடைமுறைப்படுத்த வேண்டும் என்றாா்.

பேட்டியின்போது, விவசாயிகள் சங்கத்தின் தலைவா்கள் சாமி.நடராஜன், பி.டில்லிபாபு, முகமது அலி பெருமாள், ஜி.ஆா்.ரவிச்சந்திரன், ஆா்.கே.சரவணன் ஆகியோா் உடனிருந்தனா்.

முன்னதாக, கொடுக்கம்பாளையம் கிராம மக்களை பி.சண்முகம், தமிழ்நாடு விவசாய சங்கத்தின் மாநில பொதுச் செயலா் சாமி.நடராஜன், துணைத் தலைவா் பி.டில்லி பாபு, மாா்க்சிஸ்ட் மாவட்டச் செயலா் கோ.மாதவன் ஆகியோா் சந்தித்து ஆறுதல் கூறினா்.