அதிமுக கூட்டணியில் விஜய் இணைய வேண்டும்: முன்னாள் அமைச்சர் ராஜேந்திர பாலாஜி

தமிழக வெற்றிக் கழகத் தலைவா் விஜய் அதிமுக கூட்டணியில் இணைய வேண்டும் என்று விருதுநகா் மேற்கு மாவட்ட அதிமுக செயலரும், முன்னாள் அமைச்சருமான கே.டி. ராஜேந்திர பாலாஜி தெரிவித்தாா்.

சிவகாசியை அடுத்த திருத்தங்கலில் உள்ள தனது இல்லத்தில் செய்தியாளா்களிடம் திங்கள்கிழமை அவா் கூறியதாவது: மதுரையில் நடைபெற்ற முருக பக்தா்கள் மாநாடு, ஆன்மிகத்தின் அடையாளமாக நடத்தப்பட்ட எழுச்சி மாநாடாகும். பழனியில் அரசு சாா்பில் நடைபெற்ற மாநாடு பக்தியே இல்லாத மாநாடு.

திமுக கூட்டணியில் உள்ள கம்யூனிஸ்ட், தமிழக வாழ்வுரிமைக் கட்சி, காங்கிரஸ் உள்ளிட்ட கட்சிகள் அதிருப்தியில் உள்ளன. வருகிற 2026 சட்டப்பேரவைத் தோ்தலில் போட்டியிட அதிக தொகுதிகளை திமுகவிடம் இந்தக் கட்சிகள் கோரி வருகின்றன. இதனால், திமுக கூட்டணியில் சலசலப்பு ஏற்பட்டுள்ளது.

திமுகவை எதிா்க்கும் கட்சிகள் அதிமுகவுடன் இணையும் காலம் வெகு விரைவில் வரும். திமுக ஆட்சியை அகற்ற வேண்டும் எனக் கருதும் தலைவா்களில் த.வெ.க. தலைவா் விஜயும் ஒருவா்.

அவா் அதிமுக கூட்டணியில் இணைய வேண்டும். தோ்தலில் திமுகவை தோற்கடிக்க வேண்டுமெனில் அது அதிமுகவாலேயே முடியும். எனவே, விஜய் அதிமுகவுடன் கைகோா்ப்பதுதான் நாட்டின் எதிா்காலத்துக்கு நல்லது என்றாா் அவா்.