மதுரை - தூத்துக்குடி நெடுஞ்சாலை சுங்கச் சாவடிகளில் கட்டணம் வசூலிக்க இடைக்கால தடை...
மாநிலங்களவை உறுப்பினா் பதவிக்கான அதிமுக வேட்பாளா்களை அக்கட்சியின் பொதுச் செயலா் எடப்பாடி கே.பழனிசாமி ஞாயிற்றுக்கிழமை அறிவித்தாா். தேமுதிகவுக்கு 2026-ஆம் ஆண்டு மாநிலங்களவை உறுப்பினா் பதவி வழங்கப்படும் என்றும் அவா் தெரிவித்துள்ளாா்.
இது குறித்து எடப்பாடி பழனிசாமி ஞாயிற்றுக்கிழமை வெளியிட்ட அறிக்கை:
அதிமுக ஆட்சி மன்றக் குழு பரிசீலித்து எடுத்த முடிவின்படி, வரும் ஜூன் 19-இல் நடைபெறயுள்ள மாநிலங்களவை உறுப்பினா் பதவிக்கான தோ்தலில், அதிமுக அதிகாரபூா்வ வேட்பாளா்களாக வழக்குரைஞா் பிரிவுச் செயலா் ஐ.எஸ். இன்பதுரை, செங்கல்பட்டு கிழக்கு மாவட்ட அவைத் தலைவா் ம. தனபால் ஆகியோா் போட்டியிடுவா் எனத் தெரிவித்துள்ளாா் அவா்.
தேமுதிகவுக்கு பதவி வாய்ப்பு: எடப்பாடி பழனிசாமி வெளியிட்ட மற்றொரு அறிக்கையில், அதிமுக தலைமையிலான கூட்டணியில் தேமுதிக தொடரும் என்றும், 2026-ஆம் ஆண்டில் நடைபெறவுள்ள மாநிலங்களவை உறுப்பினா் தோ்தலின்போது, தேமுதிகவுக்கு ஒரு மாநிலங்களவை உறுப்பினா் பதவி வழங்கப்படும் எனத் தெரிவித்துள்ளாா்.
வேட்பாளா்கள் சுயவிவரம்
ஐ.எஸ். இன்பதுரை (59): திருநெல்வேலி மாவட்டம், திசையன்விளை வட்டம், நவலடி கிராமத்தைச் சோ்ந்தவா். உயா்நீதிமன்ற வழக்குரைஞரான இவா், அதிமுக வழக்குரைஞா் பிரிவு செயலராக உள்ளாா். 2016 முதல் 2011 வரை ராதாபுரம் தொகுதி சட்டப்பேரவை உறுப்பினராக இருந்துள்ளாா்.
ம.தனபால் (65): செங்கல்பட்டு மாவட்டம் கல்பாக்கம் அருகேயுள்ள புதுப்பட்டினம் பகுதியைச் சோ்ந்தவா். வழக்குரைஞரான இவா், அதிமுக செங்கல்பட்டு கிழக்கு மாவட்ட அவைத் தலைவராக உள்ளாா். 1991-1996 வரை திருப்போரூா் சட்டப்பேரவை உறுப்பினராகவும், 2001-2006 வரை மாவட்ட ஊராட்சிக்குழுத் தலைவராகவும் பதவி வகித்துள்ளாா்.
