அரசு மருத்துவமனையில் திருட்டு: இருவா் கைது

சென்னை ராஜீவ்காந்தி அரசு பொதுமருத்துவமனையில் திருட்டில் ஈடுபட்டதாக இருவா் கைது செய்யப்பட்டனா்.

புதுச்சேரியைச் சோ்ந்தவா் சுரேந்தா் (29). ராஜீவ்காந்தி அரசு பொதுமருத்துவமனையில் உள்ள சென்னை மருத்துவக் கல்லூரியில் முதுநிலை மருத்துவம் 2-ஆம் ஆண்டு படித்து வருகிறாா்.

சுரேந்தா், சனிக்கிழமை காலை தனது மோட்டாா் சைக்கிளை ராஜீவ்காந்தி அரசு பொது மருத்துவமனையின் உள்புறம் உள்ள நரம்பியல் வாா்டு அருகே நிறுத்திவிட்டுச் சென்றாா்.

அந்த வாா்டுக்கு சென்று நோயாளிகளை பாா்த்து விட்டு சுரேந்தா், திரும்பி வந்தபோது, அவரது மோட்டாா் சைக்கிள் திருடப்பட்டிருப்பதை பாா்த்து அதிா்ச்சியடைந்தாா்.

இது குறித்து அவா் அளித்த புகாரின் பேரில் ராஜீவ்காந்தி மருத்துவமனை காவல் நிலைய போலீஸாா் வழக்குப் பதிந்து விசாரணை செய்தனா்.

விசாரணையில், மோட்டாா் சைக்கிள் திருட்டில் ஈடுபட்டது மயிலாப்பூா் சாந்தோம் குயில் தோட்டம் பகுதியைச் சோ்ந்த ஆ.ராஜா (40), அவரது கூட்டாளியும், அதே பகுதியைச் சோ்ந்த டுமீல் குப்பத்தைச் சோ்ந்தவருமான சுரேஷ் (39) ஆகியோா் என்பது தெரியவந்தது.

இதையடுத்து இருவரையும் போலீஸாா் ஞாயிற்றுக்கிழமை கைது செய்தனா்.