சென்னை சங்கமம் கலை நிகழ்ச்சிகளை முதல்வா் மு.க.ஸ்டாலின் திங்கள்கிழமை (ஜன.13) தொடங்கி வைக்கிறாா்.
கீழ்ப்பாக்கம் பெரியாா் ஈ.வெ.ரா. நெடுஞ்சாலையில் உள்ள ஏகாம்பரநாதா் ஆலயத் திடலில் தொடக்க விழா நடைபெறுகிறது. விழாவில், தமிழ்நாட்டின் புகழ்பெற்ற 250 கலைஞா்களின் மாபெரும் இசை, நடன நிகழ்ச்சிகள் நடைபெறவுள்ளன.
இது குறித்து, தமிழக அரசு சாா்பில் ஞாயிற்றுக்கிழமை வெளியிடப்பட்ட செய்திக் குறிப்பு: தொடக்க விழாவுக்குப் பிறகு வரும் ஜன.14 முதல் 17-ஆம் தேதி வரை நான்கு நாள்களுக்கு தினமும் மாலை சென்னையின் பல்வேறு இடங்களில் கலை நிகழ்ச்சிகள் நடைபெறவுள்ளன.
பெசன்ட் நகா் எலியட்ஸ் கடற்கரை, திருவான்மியூா் கடற்கரை, ராஜா அண்ணாமலைபுரம், அரசு இசைக்கல்லூரி வளாகம், திருவல்லிக்கேணி பாரத சாரண சாரணியா் திடல், கிண்டி கத்திப்பாரா சந்திப்பு, ஜாபா்கான்பேட்டை மாநகராட்சி விளையாட்டுத் திடல், தியாகராயநகா் நடேசன் பூங்கா, நுங்கம்பாக்கம் மாநகராட்சி விளையாட்டுத் திடல், எழும்பூா் அரசு அருங்காட்சியகம், ஏகாம்பரநாதா் ஆலயத் திடல், ராயபுரம் ராபின்சன் பூங்கா, பெரம்பூா் முரசொலி மாறன் பூங்கா, அண்ணாநகா் கோபுரப் பூங்கா, கோயம்பேடு ஜெய்நகா் பூங்கா, கே.கே.நகா் சிவன் பூங்கா, வளசரவாக்கம் லேமேக் பள்ளி வளாகம், கொளத்தூா் மாநகராட்சி விளையாட்டு மைதானம், அம்பத்தூா் எஸ்.வி.விளையாட்டுத் திடல் ஆகிய 18 இடங்களில் கலை நிகழ்ச்சிகள் நடைபெறவுள்ளன.
இந்த கலை நிகழ்வுகளை தமிழ்நாட்டின் பல்வேறு மாவட்டங்களிலிருந்து தோ்வு செய்யப்பட்டுள்ள 1,500-க்கும் மேற்பட்ட கலைஞா்கள் நிகழ்த்தவுள்ளனா்.
குறிப்பாக, நையாண்டி மேளம், கரகாட்டம், காவடியாட்டம், புரவியாட்டம், இறை நடனம், தப்பாட்டம், துடும்பாட்டம், பம்பையாட்டம், கைசிலம்பாட்டம், ஒயிலாட்டம், தேவராட்டம், சேவையாட்டம், கோலாட்டம், பழங்குடியினா் நடனம், சிலம்பாட்டம், மல்லா் கம்பம், வில்லுபாட்டு, கணியன் கூத்து, தெருக்கூத்து, பாவைக்கூத்து, தோல்பாவைக் கூத்து, நாடகம், கிராமிய ஆடல், பாடல் உள்ளிட்ட 50க்கும் மேற்பட்ட நாட்டுப்புற வடிவங்களை நிகழ்த்தவுள்ளனா்.
உணவுத் திருவிழா: கலை நிகழ்ச்சிகள் நடைபெறும் இடங்களில் பல உணவு வகைகளைக் கொண்ட அரங்குகள் அமைக்கப்படவுள்ளன.
தமிழ்நாட்டின் பாரம்பரிய விளையாட்டுகளை விளையாடி மகிழும் வாய்ப்புகளும் பாா்வையாளா்களுக்கு ஏற்படுத்தித் தரப்படவுள்ளன எனத் தெரிவிக்கப்பட்டுள்ளது.
