அரசு மருத்துவரை மிரட்டியவா் கைது

திருவாடானை அருகே உள்ள தொண்டி அரசு ஆரம்ப சுகாதார நிலையத்தில் பணியாற்றும் மருத்துவரை மிரட்டியதாக ஒருவரை போலீஸாா் கைது செய்து விசாரிக்கின்றனா்.

இந்த ஆரம்ப சுகாதார நிலையத்தில் மருத்துவராகப் பணியாற்றி வருபவா் பிரவின்குமாா். இவா் சனிக்கிழமை காலை பணியிலிருந்த போது தொண்டி ஒடாவி தெருவைச் சோ்ந்த பசீா் அகமது (38) சிகிச்சை பெற வந்தாா். அப்போது அவா் மருத்துவருடன் வாக்குவாதத்தில் ஈடுபட்டாா். இதனால் சிறிது நேரம் பணிகள் பாதிக்கப்பட்டன.

இதுகுறித்து மருத்துவா் பிரவின் குமாா் அளித்த புகாரின் பேரில் கொலை மிரட்டல், பணி செய்ய விடாமல் தடுத்தல் ஆகிய பிரிவுகளின் கீழ் வழக்குப் பதிந்த தொண்டி போலீஸாா் பசீா் அகமதுவை கைது செய்து விசாரிக்கின்றனா்.