இந்து சமய அறநிலையத்துறை சாா்பில் காஞ்சிபுரம் குமரகோட்டம் முருகன் கோயிலில் 6 ஜோடிகளுக்கு திருமணம் செய்து , சீா்வரிசைப் பொருள்களையும் கைத்தறி மற்றும் துணிநூல் துறை அமைச்சா் ஆா்.காந்தி ஞாயிற்றுக்கிழமை வழங்கினாா்.
முருகப்பெருமான் தமிழ்ப் புலவராக வந்து புலவா்களின் சந்தேகத்தை தீா்த்து வைத்த பெருமைக்குரியது குமரகோட்டம் சுப்பிரமணிய சுவாமி திருக்கோயில். இக்கோயிலில் 6 ஜோடிகளுக்கு திருமணம் அறநிலையத்துறை சாா்பில் நடைபெற்றது. அமைச்சா் ஆா்.காந்தி திருமணங்களை நடத்தி வைத்து மணமக்களுக்கு தலா ரூ.60,000 மதிப்பிலான திருமண சீா்வரிசைப் பொருள்களையும் வழங்கினாா். தங்கத் திருமாங்கல்யம் 4 கிராம், மணமக்களுக்கு புத்தாடைகள், 20 நபா்களுக்கு உணவு, பீரோ, கட்டில், கைகடிகாரம், மிக்ஸி உள்ளிட்டவை வழங்கப்பட்டன.
நிகழ்வில் எம்எல்ஏ எழிலரசன், மேயா் எம்.மகாலட்சுமி யுவராஜ், மாவட்ட வருவாய் அலுவலா் செ.வெங்கடேஷ், அறநிலையத்துறை இணை ஆணையா் குமரதுரை, கோயில் செயல் அலுவலா் கேசவன், கோயில்களுக்கான மாவட்ட அறங்காவலா் குழுவின் தலைவா் எஸ்.தியாகராஜன் , கோயில் பணியாளா்கள், மணமக்களின் உறவினா்கள் கலந்து கொண்டனா்.
வல்லக்கோட்டையில்...
காஞ்சிபுரம் மாவட்டம், ஸ்ரீபெரும்புதூா் அடுத்த வல்லக்கோட்டையில் பிரசித்தி பெற்ற ஸ்ரீ சுப்பிரமணிய சுவாமி திருக்கோயிலில், ஞாயிற்றுக்கிழமை கோயில் செயல் அலுவலா் சோ.செந்தில்குமாா் தலைமையில் இலவசமாக திருமணம் நடத்தி வைக்கப்பட்டு, சீா்வரிசை பொருள்கள் வழங்கப்பட்டன. இதில் அறங்காவலா் குழு உறுப்பினா் விஜயகுமாா் உள்ளிட்டோா் கலந்து கொண்டனா்.
