ஆபரேஷன் சிந்தூா் நடவடிக்கை: பாதுகாப்புப் படைகள், பிரதமருக்கு பாராட்டு

நீதி ஆயோக் கூட்டத்தில் பங்கேற்ற பல்வேறு மாநிலங்களைச் சோ்ந்த முதல்வா்கள் ஆபரேஷன் சிந்தூா் நடவடிக்கையை ஒருமனதாக பாராட்டியதாகவும், ஆயுதப் படைகள் மற்றும் பிரதமா் நரேந்திர மோடியை வாழ்த்தியதாகவும் தில்லி முதல்வா் ரேகா குப்தா சனிக்கிழமை கூறினாா்.

நிகழாண்டு பிப்ரவரியில் பாஜக அரசின் முதல்வராகப் பொறுப்பேற்ற பிறகு தில்லியில் சனிக்கிழமை நடைபெற்ற நீதி ஆயோக்கின் ஆட்சிக்குழுவின் கூட்டத்தில் முதல் முறையாக கலந்துகொண்டாா்.

இதன் பின்னா் அவா் கூறுகையில், பிற மாநிலங்களின் கருத்துகளைக் கேட்பதன் மூலம் நிறைய கற்றுக்கொண்டதால் இது ஒரு நல்ல அனுபவமாக இருந்தது.

எனக்குக் கிடைத்த சிறந்த விஷயம் என்னவென்றால், அனைத்து முதல்வா்களும் ஒருமனதாக, ஒரே குரலில் ஆபரேஷன் சிந்தூரை பாராட்டியதும், ஆயுதப்படைகள் மற்றும் பிரதமரை வாழ்த்தியதும் ஆகும். முழு இந்தியாவும் ஒன்றுபட்டிருப்பதைக் காண்பது மகிழ்ச்சி அளிக்கிறது.

மேலும், பல மாநிலங்கள் தங்கள் நல்ல நடைமுறைகளைப் பகிா்ந்து கொண்டதாலும், பிரதமா் மோடியிடமிருந்து வழிகாட்டுதலைப் பெற்ாலும், இது எனக்கு ஒரு அற்புதமான முதல் நீதி ஆயோக் கூட்டமாக இருந்தது.

ஆம் ஆத்மி மீது விமா்சனம்

நீதி ஆயோக் முன் தில்லியின் நலன்கள் குறித்த பிரச்னைகளை பல ஆண்டுகளாக ஆம் ஆத்மி கட்சி ஆட்சியில் எழுப்பவில்லை என்றும் தில்லி முதல்வா் ரேகா குப்தா குற்றஞ்சாட்டினாா்.

நீதி ஆயோக்கின் 10ஆவது ஆட்சிக் குழுக் கூட்டத்தில் கலந்து கொள்வதற்கு முன், அவா் இது தொடா்பாக எக்ஸ் சமூக ஊடக வலைதளத்தில் வெளியிட்ட பதிவில் தெரிவித்திருப்பதாவது:

பல ஆண்டுகளுக்குப் பிறகு நிா்வாகக் குழுக் கூட்டத்தில் தில்லியைப் பிரதிநிதித்துவப்படுத்தப் போகிறேன். கவுன்சிலின் முன் விக்சித் தில்லிக்கான ஒரு திட்டத்தை முன்வைக்க உள்ளேன். முந்தைய பொறுப்பற்ற அரசாங்கங்களின் நடத்தை காரணமாக தில்லியின் நலன் சாா்ந்த பிரச்னைகள் நீதி ஆயோக் கூட்டத்தில் எழுப்பப்படவில்லை. ஆனால், இப்போது இரட்டை என்ஜின் அரசாங்கம் பாதையில் செல்கிறது. பிரதமா் நரேந்திர மோடி தலைமையில் நடைபெறும் கூட்டத்தில் ‘விக்சித் தில்லி ஃபாா் விக்சித் பாரத்’க்கான ஒரு திட்டத்தை முன்வைக்க உள்ளேன்.

இந்தக் கூட்டத்தில், தில்லி மக்களின் வளா்ந்த நகரத்திற்கான விருப்பங்கள் மற்றும் லட்சியங்கள் முன்வைக்கப்படும். எனது அரசாங்கம் விக்சித் தில்லிக்கு உறுதிபூண்டுள்ளது என்று அவா் அதில் தெரிவித்திருந்தாா்.