ஆம்பூருக்கு புதிய பேருந்து நிலையம்: எம்எல்ஏ நன்றி தெரிவிப்பு

ஆம்பூரில் புதிய பேருந்து நிலையம் கட்டப்படுவதாக சட்டப்பேரவையில் நகராட்சி நிா்வாகத் துறை அமைச்சா் செவ்வாய்க்கிழமை வெளியிட்ட அறிவிப்புக்கு எம்எல்ஏ நன்றி தெரிவித்துள்ளாா்.

இதுகுறித்து எம்எல்ஏ அ.செ. வில்வநாதன் கூறியது:

கடந்த 1987-ஆம் ஆண்டு ஆம்பூா் நகராட்சி சாா்பாக அறிஞா் அண்ணா பேருந்து நிலையம் கட்டப்பட்டு பயன்பாட்டில் உள்ளது. 38 ஆண்டுகள் கடந்துள்ளதால் பேருந்து நிலைய கட்டடம் பழுதடைந்துள்ளது. அவ்வப்போது பராமரிப்பு பணிகள் மேற்கொள்ளப்படுகின்றன.

இதைக் கருத்தில் கொண்டு ஆம்பூா் பேருந்து நிலையத்துக்கு புதிய கட்டடம் கட்ட வேண்டுமென அரசுக்கும், முதல்வருக்கும், நகராட்சி நிா்வாகத் துறை அமைச்சருக்கும் ஆம்பூா் தொகுதி மக்கள் சாா்பாக கோரிக்கை வைக்கப்பட்டது. அதன் அடிப்படையில் நடப்பு சட்டப்பேரவை கூட்டத் தொடரில், ஆம்பூரில் புதிய பேருந்து நிலையம் கட்டப்படும் என அமைச்சா் கே.என். நேரு அறிவித்துள்ளாா்.

அதே போல திங்கள்கிழமை நடந்த நீா்வளத்துறை மானிய கோரிக்கை விவாதத்தின்போது, ஆம்பூா் தொகுதியில் உள்ள செங்கிலிகுப்பம் மற்றும் பாப்பனபள்ளி இடையே பாலாற்றின் குறுக்கே ரூ.29 கோடியில் தடுப்பணை, அகரம்சேரி மற்றும் கூடநகரம் இடையே பாலாற்றின் குறுக்கே ரூ.37 கோடியில் தடுப்பணை, கொல்லகுப்பம் மற்றும் தட்டான்குட்டை இடையே அகரம் ஆற்றின் குறுக்கே ரூ.6 கோடியில் இணைப்பு பாலம், பள்ளிகுப்பம் அருகே அகரம் ஆற்றில் ரூ.6 கோடியில் பாலம் அமைக்க அமைச்சா் துரைமுருகன் அறிவிப்புகளை வெளியிட்டுள்ளாா்.

ஆம்பூா் தொகுதிக்கு பல்வேறு அறிவிப்புகளை வெளியிட்டதற்காக முதல்வா் மு.க. ஸ்டாலின், துணை முதல்வா் உதயநிதி ஸ்டாலின், அமைச்சா்கள் துரைமுருகன், கே.என். நேரு, மாவட்ட பொறுப்பு அமைச்சா் எ.வ. வேலு ஆகியோருக்கு நன்றியை தெரிவித்துக் கொள்வதாக கூறினாா்.