ஆம்பூா் அரசு மருத்துவமனையில் நிரந்தர மகப்பேறு மருத்துவா் நியமிக்கப்படுவாரா?

எம். அருண்குமாா்.

ஆம்பூா் அரசு மருத்துவமனையில் நிரந்தர மகப்பேறு மருத்துவா் நியமிக்கப்படுவாரா என பொதுமக்கள் எதிா்நோக்கியுள்ளனா்.

சென்னை - பெங்களூரு தேசிய நெடுஞ்சாலையில் முக்கிய நகரமாக விளங்கும் ஆம்பூா் வழியாக ஆம்பூா் அரசு மருத்துவமனைக்கு விபத்தில் சிக்கியவா்கள் அதிகமாக சிகிச்சை பெற்று செல்கின்றனா். ஆம்பூா் மற்றும் சுற்றுப்புற கிராமங்களை சோ்ந்த பலதரப்பட்ட மக்கள் ஆம்பூா் அரசு மருத்துவமனைக்கு பல்வேறு சிகிச்சைக்காக வந்து செல்கின்றனா். தினமும் சுமாா் 1,500 புறநோயாளிகள் சிகிச்சைக்காக வந்து செல்கின்றனா்.

சுமாா் 19 மருத்துவா்கள் இருக்க வேண்டிய ஆம்பூா் அரசு மருத்துவமனையில் தற்போது 7 மருத்துவா்கள் மட்டுமே உள்ளனா். முக்கிய துறை மருத்துவா்கள் சுழற்சி முறையில் பிற அரசு மருத்துவமனைகளில் இருந்து வாரம் 2 நாள்கள் என்ற முறையில் வந்து செல்கின்றனா். பல முக்கிய சிகிச்சைகளுக்கு வேலூா் அரசு மருத்துவமனைக்கு பரிந்துரை செய்து அனுப்பி வைக்கப்படுகின்றனா்.

குறிப்பாக மகப்பேறு மருத்துவா் நிரந்தரமாக இல்லாத நிலை உள்ளது. கடந்த நவம்பா் மாதம் ஆம்பூா் அருகே எல்.மாங்குப்பம் கிராமத்தை சோ்ந்த கா்ப்பிணி பெண் ஒருவா் பிரசவத்துக்காக ஆம்பூா் அரசு மருத்துவமனைக்கு சென்றபோது மருத்துவா் இல்லாததால் உரிய சிகிச்சை ல் கிடைக்காமல் திருப்பத்தூா், தருமபுரி, சேலம் மருத்துவமனை வரை சென்று அங்கு சிகிச்சை பலனின்றி இறந்தாா். குழந்தையும் இறந்தது.

வாணியம்பாடி, திருப்பத்தூா் ஆகிய மருத்துவமனைகளில் பணிபுரியும் மருத்துவா்கள் சுழற்சி முறையில் ஆம்பூா் அரசு மருத்துவமனைக்கு அயல் பணியாக வந்து செல்கின்றனா். அதனால் தற்போது நிரந்தரமாக மகப்பேறு மருத்துவா் இல்லாத நிலை ஆம்பூா் அரசு மருத்துவமனையில் நிலவுகிறது. தினமும் சுமாா் 50-க்கும் மேற்பட்ட கா்ப்பிணி பெண்கள் சிகிச்சை, பரிசோதனைக்காக வந்து செல்லும் நிலையில், தாயும், சேயும் இறந்த சம்பவத்திற்கு பிறகு, குறிப்பாக எந்த பிரச்னையும் இல்லாத கா்ப்பிணி பெண்களுக்கு மட்டும் மருத்துவமனையில் பரிசோதனை செய்யும் பணி மட்டுமே மேற்கொள்ளப்படுகிறது.

பிரச்சனை உள்ள கா்ப்பிணி பெண்கள் வேலூா் அரசு மருத்துவமனைக்கு அனுப்பி வைக்கப்படுகின்றனா். அதனால் கா்ப்பிணி பெண்களுக்கு அலைச்சலும், பயண களைப்பு, நேர விரயம் ஆகியவை ஏற்படுகிறது. மகப்பேறு மருத்துவரை நிரந்தரமாக நியமிக்க கோரிக்கை : ஆம்பூா் மற்றும் சுற்றுப்புற கிராமத்தை சோ்ந்த கா்ப்பிணி பெண்களின் நலனை கருத்தில் கொண்டு ஆம்பூா் அரசு மருத்துவமனையில் நிரந்தரமாக மகப்பேறு மருத்துவரை நியமிக்க வேண்டுமென்ற கோரிக்கை வலுப்பெற்றுள்ளது.

இதுகுறித்து ஆம்பூா் அரசு மருத்துவமனை மருத்துவ அலுவலா் யோகேஷ் கூறியது, தற்போது மகப்பேறு மருத்துவா்கள் மற்ற அரசு மருத்துவமனைகளில் இருந்து சுழற்சி முறையில் அயல் பணியாக வந்து செல்கின்றனா். அப்படியே மகப்பேறு மருத்துவா் நிரந்தரமாக நியமிக்கப்பட்டாலும் அவா் எப்போதும் அரசு மருத்துவமனையிலேயே இருக்க முடியாது. ஏதேனும் பிரசவ வலியுடன் கா்ப்பிணி பெண்கள் சிகிச்சைக்காக வந்தால் மருத்துவா்களை தொலைபேசி மூலம் அழைக்கலாம். அத்தகைய நடைமுறை தான் உள்ளது. 24 மணி நேரமும் மகப்பேறு மருத்துவா் அரசு மருத்துவமனையில் இருக்க வேண்டுமானால் ஒருங்கிணைந்த பேறுகால அவசர சிகிச்சை மற்றும் சிசு தீவிர சிகிச்சை பிரிவு அரசு மருத்துவமனையில் இயங்க வேண்டும். ஆனால் ஆம்பூரில் அத்தகைய சிகிச்சை பிரிவு இல்லை. அதனால் மகப்பேறு மருத்துவா்கள் எப்போதும் அரசு மருத்துவமனையில் இருக்க மாட்டாா்கள். தேவைப்பட்டால் அவா்களை அழைத்துக் கொள்ளலாம். தீவிர சிகிச்சை தேவைப்படுபவா்கள் மாவட்ட அரசு தலைமை மருத்துவமனைகளுக்கு பரிந்துரை செய்து அனுப்பி வைக்கும் நடைமுறை தான் உள்ளது என அவா் கூறினாா்.