ஆரணி: மனைவியை பிரிந்து மாணவி மீது காதல் - அடித்துக் கொல்லப்பட்ட இளைஞன்; மாணவியின் தந்தை வெறிச்செயல்

திருவண்ணாமலை மாவட்டம், ஆரணி அடுத்துள்ள முக்குறும்பை ஊராட்சிக்குஉட்பட்ட அனந்தபுரம் கிராமத்தைச் சேர்ந்தவர் வடிவேலன் (வயது 27). தனியார் கூரியர் நிறுவனத்தில் வேலை செய்துவந்த வடிவேலனுக்கு கடந்த இரண்டு ஆண்டுகளுக்கு முன்பு திருமணம் ஆனது. ஆனாலும், சில மாதங்களிலேயே கருத்து - வேறுபாடு காரணமாக அவரைப் பிரிந்து மனைவி சென்றுவிட்டார். இந்த நிலையில், அதே பகுதியைச் சேர்ந்த பிளஸ்-2 பயிலும் 16 வயது மாணவியை தனது காதல் வலையில் வீழ்த்தியிருக்கிறார் வடிவேலன். இது குறித்து மாணவியின் பெற்றோருக்குத் தெரியவந்ததும், வடிவேலனை அழைத்து அவர்கள் கண்டித்திருக்கின்றனர்.

கடந்த 20 நாள்களுக்கு முன்பு ஊர் பெரியவர்களும் தலையிட்டு வடிவேலுவை எச்சரிக்கை செய்திருக்கின்றனர். அதன் பிறகும் அடங்காத வடிவேலன், தொடர்ந்து போன் மூலம் மாணவியிடம் பேச முயன்று தொல்லை கொடுத்துவந்திருக்கிறார். இதனால் ஆத்திரமடைந்த மாணவியின் தந்தை சங்கர் (46) தனது உறவினர் சிவஞானத்தை அழைத்துகொண்டு நேற்று முக்குறும்பை அருகேயுள்ள கோயில் பகுதியில் வடிவேலனை தாக்கும் திட்டத்துடன் காத்திருந்தார்.

நினைத்ததைபோலவே, வடிவேலன் அந்த வழியாக பைக்கில் வரும்போது, இருவரும் சேர்ந்து அவரை மடக்கி கட்டைகளால் சரமாரியாக தாக்குதல் நடத்தியிருக்கின்றனர். கற்களைக் கொண்டும் தாக்கியதால், பலத்த காயமடைந்த வடிவேலன் சுருண்டு விழுந்தார். இதையடுத்து, இருவரும் அங்கிருந்து தப்பி ஓடிவிட்டனர். தகவலறிந்ததும், அங்கு சென்ற வடிவேலனின் உறவினர்கள் அவரை மீட்டு மருத்துவமனைக்கு தூக்கிச் சென்றனர். பரிசோதனை செய்த மருத்துவர்கள், வடிவேலன் இறந்துவிட்டதாகக் கூறினர்.

இதனால், கதறி அழுத உறவினர்கள் ஆரணி - போளூர் சாலையில் திரண்டு கொலையாளிகளை கைது செய்யக்கோரி போராட்டத்தில் ஈடுபட்டனர். ஆரணி டி.எஸ்.பி சுரேஷ் சண்முகம் தலைமையில் விரைந்து சென்ற களம்பூர் காவல் நிலைய போலீஸார் சமரச பேச்சுவார்த்தை நடத்தி போராட்டத்தை கலைத்தனர். அதைத்தொடர்ந்து, தலைமறைவாக இருந்த மாணவியின் தந்தை உட்பட இருவரையும் கைது செய்தனர். விசாரணைக்குப் பிறகு இருவரையும் நீதிமன்றக் காவலில் வேலூர் மத்திய சிறையில் அடைத்திருக்கின்றனர். இந்தச் சம்பவம், அப்பகுதியில் பெரும் பரபரப்பை ஏற்படுத்தியிருக்கிறது.