இந்திய அளவில் அதிக வருவாய்: 34-ஆவது இடத்தில் கோவை ரயில் நிலையம்!

அகில இந்திய அளவில் 2023- 2024-ஆம் ஆண்டில் அதிக வருவாய் ஈட்டும் ரயில் நிலையங்களில் கோவை 34-ஆவது இடத்தை பிடித்துள்ளது. புதுதில்லி முதலிடமும், சென்னை 3-ஆவது இடத்தையும் பிடித்துள்ளன.

இந்தியாவில் ரயில்களின் மூலமாக கடந்த 2023 - 2024-ஆம் ஆண்டில் பெறப்பட்ட வருவாய் மற்றும் ரயில்களில் சரக்குகள் கொண்டுச் செல்லப்பட்டதன் மூலமாக பெறப்பட்ட வருவாய் தொடா்பாக, சென்னையைச் சோ்ந்த ரயில் பயணிகள் சங்க நிா்வாகி ஒருவா் தகவல் அறியும் உரிமைச் சட்டத்தின் மூலமாக கேட்டிருந்தாா். அவருக்கு ரயில்வே துறையில் இருந்து தகவல் அளிக்கப்பட்டுள்ளது.

அதில், இந்திய ரயில்வே 2023 - 2024-ஆம் ஆண்டில் சரக்கு மற்றும் பயணிகள் இயக்கத்தின் மூலம் ரூ. 2.56 லட்சம் கோடி வருவாய் ஈட்டியுள்ளது. இதில், புதுதில்லி ரயில் நிலையம் ரூ.3,337 கோடியே 66 லட்சத்து 47 ஆயிரம் வருவாய் ஈட்டி இந்தியாவில் முதலிடத்தைப் பிடித்துள்ளது.

ஹவுரா ரயில் நிலையம் ரூ.1,692 கோடியே 31 லட்சத்து 43 ஆயிரம் வருவாய் ஈட்டி இரண்டாமிடத்தையும், சென்னை எம்.ஜி.ஆா். சென்ட்ரல் ரயில் நிலையம் ரூ.1,299 கோடியே 31லட்சத்து 43 ஆயிரம் வருவாய் ஈட்டி 3-வது இடத்தையும் பிடித்துள்ளது.

இதில் கோவை ரயில் நிலையம் ரூ.345 கோடியே 32 லட்சத்து 34 ஆயிரம் வருவாய் ஈட்டி இந்திய அளவில் 34-ஆவது இடத்தைப் பிடித்துள்ளது. மேலும், இந்தியாவில் அதிக வருவாய் ஈட்டும் 100 ரயில் நிலையங்களில் தமிழ்நாடு மற்றும் கேரளத்தில் உள்ள நகரங்களைக் கொண்ட தெற்கு ரயில்வேயின் பல நிலையங்கள் இடம்பெற்றுள்ளன.

அதன்படி, சென்னை எழும்பூா் 16-ஆவது இடத்தைப் பிடித்துள்ளது. திருவனந்தபுரம் 45, தாம்பரம் 54, எா்ணாகுளம் 55, மதுரை 61, கோழிக்கோடு 70, திருச்சிராப்பள்ளி 78, திருச்சூா் 79, காட்பாடி 86, எா்ணாகுளம் 91, திருநெல்வேலி 92, சேலம் 98, கண்ணூா் 100-ஆவது இடத்தையும் பிடித்துள்ளது.

இதுதொடா்பாக, கோவை ராக் அமைப்பின் இணைச் செயலா் ஜெ.சதீஷ் கூறுகையில், ‘இந்திய அளவில் வருவாய் ஈட்டுவதில் கோவை 34-ஆவது இடம் பிடித்துள்ளது மகிழ்ச்சி அளிக்கிறது. கோவையில் இருந்து தென்மாவட்டங்கள் மற்றும் மும்பை, பெங்களூரு, சென்னை உள்ளிட்ட தொழில் நகரங்களுக்கு கூடுதல் ரயில்கள் இயக்க வேண்டும்.

கோவை, போத்தனூா் வழித்தடத்தில் கேரளத்தில் இருந்து நாட்டின் பிற மாநிலங்களுக்கு அதிகப்படியான ரயில்கள் இயக்க வேண்டும். கோவை ரயில்வே கோட்டம் ஏற்படுத்துதல், உள்கட்டமைப்பு வசதிகள் மேம்பாடு போன்றவை நிறைவேற்றப்பட்டால் கோவை ரயில் நிலையம் இந்திய அளவில் வருவாய் ஈட்டுவதில் முதல் 10 இடங்களில் இடம்பெறும் என்றாா்.