கோழியின நோய் ஆய்வகத்தில் பரிசோதிக்கப்பட்ட இறந்த கோழிகள் பெரும்பாலும் இறக்கை அழுகல் நோயால் பாதிக்கப்பட்டிருந்ததாக வானிலை ஆய்வு மையம் தெரிவித்துள்ளது.
இதுகுறித்து நாமக்கல் கால்நடை மருத்துவக் கல்லூரி வானிலை ஆய்வு மையம் வெள்ளிக்கிழமை வெளியிட்ட செய்திக் குறிப்பு:
கடந்த வார வானிலையைப் பொருத்தமட்டில் பகல் மற்றும் இரவு நேர வெப்ப அளவுகள் முறையே, 91.4, 73.4 டிகிரியாக காணப்பட்டது. அடுத்த ஐந்து நாள்களுக்கான வானிலையில், வானம் லேசான மேகமூட்டத்துடன் காணப்படும், ஒரு சில இடங்களில் மழைக்கு வாய்ப்புள்ளது. பகல் மற்றும் இரவு நேர வெப்ப அளவுகள் முறையே 93.2, 73.4 டிகிரியாக காணப்படும். காற்று வடகிழக்கு திசையிலிருந்து மணிக்கு 10 கி.மீ. வேகத்தில் வீசக்கூடும்.
சிறப்பு ஆலோசனை: கடந்த வாரம் கோழியின நோய் ஆய்வகத்தில் இறந்த கோழிகளை பரிசோதனை செய்ததில் பெரும்பாலானவை இறக்கை அழுகல் நோயால் பாதிக்கப்பட்டு இறந்திருப்பது தெரியவந்தது. இந்நோயின் தாக்கத்தை குறைக்க கோழிப் பண்ணைகளில் உயிா்பாதுகாப்பு முறைகளை பண்ணையாளா்கள் செய்திட வேண்டும். கிளாஸ்ரிடியம், ஸ்டெப்லோக்காக்கஸ், ஈக்கோலை ஆகியவற்றின் தாக்கம் உள்ளதா என்ற பரிசோதனையை மேற்கொள்ள வேண்டும். அதற்கேற்ப தீவன மேலாண்மை முறைகளை கையாள வேண்டும் என அதில் தெரிவிக்கப்பட்டுள்ளது.
