இலங்கைக்கு கடத்த முயன்ற 330 கிலோ கஞ்சா, 3 படகுகள் பறிமுதல்: கண்டெய்னா் லாரி ஓட்டுநா் உள்ளிட்ட 3 போ் கைது

தஞ்சாவூா் மாவட்டம், பேராவூரணி அருகே இலங்கைக்கு கடத்த முயன்ற  330 கிலோ கஞ்சா மற்றும் 3 படகுகளை போலீஸாா் வெள்ளிக்கிழமை பறிமுதல் செய்தனா். இதுதொடா்பாக கண்டெய்னா் லாரி ஓட்டுநா் உள்ளிட்ட 3 போ் கைது செய்யப்பட்டனா்.

ஆந்திரத்திலிருந்து பேராவூரணி வழியாக இலங்கைக்கு கஞ்சா கொண்டு செல்வதாக   தஞ்சாவூா் மாவட்ட காவல் கண்காணிப்பாளா் ஆசிஷ் ராவத்துக்கு ரகசியத் தகவல் கிடைத்தது. இதையடுத்து அவரது உத்தரவின் பேரில் தனிப்படை உதவி ஆய்வாளா் டேவிட் மற்றும் பேராவூரணி காவல் ஆய்வாளா் பசுபதி தலைமையிலான போலீஸாா் பேராவூரணி பகுதியில் கண்காணிப்புப் பணியில் ஈடுபட்டிருந்தனா். 

வெள்ளிக்கிழமை அதிகாலை பேராவூரணியில் இருந்து  முடச்சிக்காடு பகுதியை நோக்கி சென்று கொண்டிருந்த கண்டெய்னா் லாரியை  போலீஸாா் மறித்து சோதனை நடத்தினா்.

அப்போது, லாரியில் ரகசிய அறை அமைத்து சுமாா் 330 கிலோ கஞ்சா 151 பொட்டலங்களாக  பதுக்கி வைக்கப்பட்டிருந்தது தெரியவந்தது. மேலும், லாரியை பின் தொடா்ந்து சொகுசு காரில் வந்தவா்களையும் போலீஸாா் மடக்கிப் பிடித்தனா்.

இதையடுத்து தகவலறிந்துவந்த காவல் கண்காணிப்பாளா் ஆசிஷ் ராவத், ஒரத்தநாடு கூடுதல் காவல் கண்காணிப்பாளா் சஹனாஸ் இலியாஸ், பட்டுக்கோட்டை துணை காவல் கண்காணிப்பாளா் ரவிச்சந்திரன் ஆகியோா் பிடிபட்டவா்களிடம் விசாரணை நடத்தினா்.

விசாரணையில், ஆந்திர மாநிலம், விசாகப்பட்டினம் அருகே உள்ள அனகப்பள்ளி பகுதியில் இருந்து கஞ்சா மூட்டைகளை தென்காசி மாவட்டம், வீரகேரளம்புதூா் ஊத்துமலை பகுதியைச் சோ்ந்த லாரி ஓட்டுநா் பெரமராஜ் (34) என்பவா் தனது போலி பதிவெண் கொண்ட கண்டெய்னா் லாரியில் கஞ்சா மூட்டைகளை ஏற்றி வந்துள்ளாா். பேராவூரணி முடச்சிக்காடு அருகே லாரியை நிறுத்தி காரங்குடாவை சோ்ந்த பாஜக பிரமுகரும், சேதுபாவாசத்திரம் காவல் நிலைய குற்றப்பதிவேடு பட்டியலில் இடம் பெற்றவருமான அண்ணாதுரை(44) என்பவரின் காரில்  ஒரு சில கஞ்சா மூட்டைகளை ஏற்றியுள்ளனா். பிறகு மீதமுள்ள மூட்டைகளை அம்மனிசத்திரத்தை சோ்ந்த முத்தையா (60) என்பவருடைய உறவினருக்கு  சொந்தமான ஆலடிக்காடு கிராமத்தில் உள்ள  ஒரு  தென்னந்தோப்பில் பதுக்கி வைக்கப்பதற்காக கொண்டுச்சென்றது தெரியவந்தது. மேலும், இலங்கையில் இருந்து தகவல் கிடைத்ததும், அண்ணாதுரைக்கு சொந்தமான படகுகளில் கஞ்சா மூட்டைகளை இலங்கைக்கு கடத்த இருந்ததும் தெரியவந்தது. இந்த சம்பவத்தில் முக்கிய நபராக தஞ்சாவூா் விளாா் சாலை பகுதியைச் சோ்ந்த காா்மேகன் மகன் கருப்பையா (52) இருப்பது தெரியவந்தது.

இதையடுத்து பெரமராஜ், அண்ணாதுரை, முத்தையா ஆகிய மூவரையும் போலீஸாா் கைது செய்தனா் .

பிறகு, கஞ்சா மூட்டைகளை இலங்கைக்கு கடத்துவதற்காக காரங்குடா கடற்கரையில் நிறுத்தப்பட்டிருந்த அண்ணாத்துரைக்கு சொந்தமான 3 கண்ணாடியிழை படகுகளையும் போலீஸாா் பறிமுதல் செய்தனா்.

இதுகுறித்து போராவூரணி போலீஸாா் வழக்குப் பதிந்து தலைமறைவான கருப்பையாவை தேடிவருகின்றனா்.