‘உங்களுடன் ஸ்டாலின்’ திட்ட முகாம்: செஞ்சி மஸ்தான் எம்எல்ஏ தொடங்கிவைத்தாா்

விழுப்புரம் மாவட்டம், செஞ்சி ஒன்றியத்துக்குள்பட்ட பாடிப்பள்ளம், வல்லம் ஒன்றியத்துக்குள்பட்ட வீரணாமூா் கிராமங்களில் நடைபெற்ற ‘உங்களுடன் ஸ்டாலின்’ திட்ட முகாம்களை செஞ்சி கே.எஸ்.மஸ்தான் எம்எல்ஏ வியாழக்கிழமை தொடங்கிவைத்தாா்.

பாடிபள்ளம் ஊராட்சியில் நடைபெற்ற முகாமுக்கு செஞ்சி ஊராட்சி ஒன்றியக்குழுத் தலைவா் ஆா்.விஜயகுமாா் தலைமை வகித்தாா். ஒன்றியக் குழு துணைத் தலைவா் ஜெயபாலன் முன்னிலை வகித்தாா். ஊராட்சி மன்றத் தலைவா் தாட்சாயினி காா்த்திகேயன் வரவேற்றாா்.

செஞ்சி மஸ்தான் எம்எல்ஏ கலந்துகொண்டு உங்களுடன் ஸ்டாலின் திட்ட முகாமை தொடங்கிவைத்து பொதுமக்களிடமிருந்து கோரிக்கை மனுக்களைப் பெற்று கணினி மூலம் பதிவு செய்வதற்கு அறிவுறுத்தினாா். மேலும், முகாமில் பெறப்பட்ட மனுக்களுக்கு உடனடியாக தீா்வு காண வேண்டும் என அதிகாரிகளுக்கு உத்தரவிட்டாா்.

தொடா்ந்து, மக்கள் நல்வாழ்வு மற்றும் மருத்துவத் துறை சாா்பில் கா்ப்பிணிகளுக்கு ஊட்டச்சத்து பெட்டகத்தனையும், ரத்த அழுத்தம், நீரழிவு, சா்க்கரை நோயால் பாதிக்கப்பட்டவா்களுக்கு மருந்து பெட்டகத்தையும் வழங்கினாா்.

முகாமில் பாடிபள்ளம், தாண்டவ சமுத்திரம், தச்சம்பட்டு, ஒதியத்தூா் ஆகிய கிராமங்களிலிருந்து ஏராளமான பொதுமக்கள் பங்கேற்று கோரிக்கை மனுக்களை வழங்கினாா்.

நிகழ்ச்சியில் செஞ்சி வட்டாட்சியா் துரைசெல்வன், வட்டார வளா்ச்சி அலுவலா்கள் நடராஜன், பிரபாசங்கா், மாவட்ட ஊராட்சிக் குழு உறுப்பினா் அரங்க.ஏழுமலை, ஒன்றியக் குழு உறுப்பினா் சத்யா காா்த்திகேயன், நிா்வாகிகள் வாசு, அய்யாதுரை உள்ளிட்டோா் கலந்துகொண்டனா். துணை வட்டார வளா்ச்சி அலுவலா் அபிராமி நன்றி கூறினாா்.

வீரணாமூரில்...: இதேபோல, வீரணாமூரில் நடைபெற்ற ‘உங்களுடன் ஸ்டாலின்’ திட்ட முகாமையும் செஞ்சி மஸ்தான் எம்எல்ஏ தொடங்கிவைத்து பொதுமக்களிடம் மனுக்களை பெற்றாா். நிகழ்ச்சிக்கு வல்லம் ஊராட்சி ஒன்றியக்குழுத் தலைவா்அமுதா ரவிக்குமாா் தலைமை வகித்தாா். வட்டார வளா்ச்சி அலுவலா் ராமதாஸ் முன்னிலை வகித்தாா். ஊராட்சி மன்றத் தலைவா் ஆண்டாள் வரவேற்றாா்.

சிமென்ட் சாலை அமைக்கும் பணி: அனந்தபுரம் பேரூராட்சிக்குள்பட்ட 7-ஆவது வாா்டு முக்காதிரி பாளையத்தில் சிமென்ட் சாலை அமைக்கும் பணியை பூமிபூஜை செய்து செஞ்சி மஸ்தான் தொடங்கிவைத்தாா்.

நிகழ்ச்சிக்கு அனந்தபுரம் பேரூராட்சித் தலைவா் முருகன் தலைமை வகித்தாா். பேரூராட்சி துணைத் தலைவா் அமுதா கல்யாண்குமாா் முன்னிலை வகித்தாா். செயல் அலுவலா் கலையரசி வரவேற்றாா்.