உத்தரமேரூர் வைகுண்ட பெருமாள் கோயிலில் ஆளுநர் தரிசனம்

குடவோலை முறை கல்வெட்டுகள் உள்ள பழைமைவாய்ந்த உத்தரமேரூர் வைகுண்ட பெருமாள் கோயிலில் தமிழக ஆளுநர் ஆர்.என்.ரவி செவ்வாய்க்கிழமை குடும்பத்துடன் தரிசனம் செய்து கல்வெட்டுகளைப் பார்வையிட்டார்.

காஞ்சிபுரம் மாவட்டம், உத்தரமேரூரில் பிரசித்தி பெற்ற வைகுண்ட பெருமாள் கோயில் உள்ளது. இந்த கோயிலில், 1,000 ஆண்டுகளுக்கு முன்பே குடவோலை முறையில் தேர்தல் நடந்ததற்கான வழிமுறைகள் பொறிக்கப்பட்ட கல்வெட்டுகள் உள்ளன.

இந்தக் கல்வெட்டுகள் குறித்து, பிரதமர் நரேந்திர மோடி மனதின் குரல் நிகழ்ச்சியில் பேசியதைத் தொடர்ந்து, உத்தரமேரூர் வைகுண்ட பெருமாள் கோயிலுக்கு இந்தியாவின் பல்வேறு மாநிலங்களைச் சேர்ந்த கல்வெட்டு ஆய்வாளர்கள், வரலாற்று ஆய்வாளர்கள், சுற்றுலா பயணிகள், பள்ளி மாணவர்கள், வெளிநாட்டு சுற்றுலா பயணிகள் பார்வையிட்டு செல்கின்றனர்.

இந்த நிலையில், உத்தரமேரூர் வைகுண்ட பெருமாள் கோயிலுக்கு ஆளுநர் ஆர்.என்.ரவி குடும்பத்துடன் வந்து சுவாமி தரிசனம் செய்தார். பின்னர், கோயில் சுவர்களில் உள்ள குடவோலை தேர்தல் முறை குறித்த கல்வெட்டுகளையும் பார்வையிட்டார். கோயிலுக்கு வந்த ஆளுநரை கோயில் நிர்வாகத்தினர் பூர்ணகும்ப மரியாதையுடன் வரவேற்றனர்.

காஞ்சிபுரம் சார்-ஆட்சியர் ஆஷிக் அலி, இந்து சமய அறநிலையத் அதிகாரிகள், கல்வெட்டு நிபுணர்கள் கோயில் கல்வெட்டில் உள்ள சிறப்புகள் குறித்து ஆளுநர் ஆர்.என். ரவிக்கு விளக்கினர். காஞ்சிபுரம் மாவட்டக் காவல் கண்காணிப்பாளர் சண்முகம் தலைமையில், 100-க்கும் மேற்பட்ட போலீஸôர் பாதுகாப்புப் பணியில் ஈடுபட்டனர்.