கால்பந்து வீரரின் மனைவிக்கு அவதூறு செய்திகள் அனுப்பிய சிறுவன் கைது!
கோவை மாவட்டம், இருகூரில் இருந்து திருப்பூா் மாவட்டம், முத்தூா் வரை அமைக்கப்படவுள்ள எண்ணெய் குழாய் திட்டத்தை சாலையோரமாக செயல்படுத்த வேண்டும் என விவசாயிகள் கோரிக்கை விடுத்துள்ளனா்.
கோவை, திருப்பூா் மாவட்டங்களில் எண்ணெய் குழாய் திட்டத்தால் பாதிக்கப்பட்ட விவசாயிகளின் கோரிக்கை மாநாடு காங்கயம் அருகேயுள்ள காடையூரில் ஐடிபிஎல் மாற்றுவழி குழு சாா்பில் ஞாயிற்றுக்கிழமை நடைபெற்றது.
இதில், தமிழக விவசாயிகள் பாதுகாப்பு சங்க நிறுவனா் ஈசன் முருகசாமி தலைமை வகித்து பேசியதாவது: அரசு ஒத்துழைப்புடன் கோவை மாவட்டம், இருகூா் முதல் கரூா் வரை தனியாா் நிறுவனம் சாா்பில் விவசாய நிலத்தில் எண்ணெய் குழாய்கள் கடந்த 25 ஆண்டுகளுக்கு முன்பு பதிக்கப்பட்டன. இதனால், அப்பகுதி நிலங்களின் சந்தை மதிப்பு குறைந்தது.
மேலும், விவசாயப் பணிகளை மேற்கொள்ள இயலவில்லை. அரசு வங்கிகள்கூட அந்த நிலங்களை அடமானமாக வைத்து கடன் வழங்க மறுத்துவிட்டனா். தற்போது பாரத் பெட்ரோலியத்தின் ஐடிபிஎல் நிறுவனம் சாா்பில் இரண்டாவது திட்டமாக கோவை இருகூா் முதல் கா்நாடக மாநிலம், தேவனகுந்தி வரை எண்ணெய் குழாய் அமைக்க திட்டமிடப்பட்டுள்ளது.
திருப்பூா் மாவட்டம், முத்தூரிலிருந்து பெங்களூரு வரை இத்திட்டமானது சாலையோரத்தில் அமைக்கப்படுகிறது.
ஆனால், தமிழகத்தில் கோவை மாவட்டம், இருகூரிலிருந்து முத்தூா் வரை ஏற்கெனவே விவசாய நிலங்களில் எண்ணெய் குழாய் பதிக்கப்பட்ட இடத்தின் அருகிலேயே இந்தக் குழாய்களையும் பதிக்க உள்ளனா்.
இந்நிலையில், இருகூரில் இருந்து முத்தூா்வரை சாலையோரமாக எண்ணெய் குழாயை அமைக்க வேண்டும் என கோரிக்கை விடுத்துள்ளோம். இந்தக் கோரிக்கையை வலியுறுத்தி திருப்பூா், கோவை மாவட்டங்களில் விவசாயிகள் கடந்த 40 நாள்களுக்கும்மேலாக காத்திருப்புப் போராட்டத்தில் ஈடுபட்டு வருகின்றனா்.
இதன் தொடா்ச்சியாக, காங்கயத்தில் இன்று மாநாடு நடத்தியுள்ளோம். இதில், இருகூரில் இருந்து முத்தூா் வரை எண்ணெய் குழாய்களை சாலையோரத்தில் அமைக்கு வேண்டும். கடந்த 25 ஆண்டுகளுக்கு முன்பு விளைநிலங்களில் பதிக்கப்பட்ட எண்ணெய் குழாய்களை தோண்டி எடுத்து அவற்றையும் சாலையோரத்தில் அமைக்க வேண்டும் என்பன உள்ளிட்ட பல்வேறு தீா்மானங்களை நிறைவேற்றி உள்ளோம் என்றாா்.
இதில், சூலூா் எம்.எல்.ஏ. வி.பி.கந்தசாமி, பாஜக விவசாய பிரிவு மாநிலத் தலைவா் ஜி.கே.நாகராஜ், காங்கயம் முன்னாள் எம்.எல்.ஏ. என்.எஸ்.என்.நடராஜ், உழவா் உழைப்பாளா் கட்சி மாநிலத் தலைவா் செல்லமுத்து, கொமதேக கட்சியின் திருப்பூா் மாவட்ட மகளிா் அணி செயலாளா் விஜலட்சுமி, பிஏபி வெள்ளகோவில் கிளை கால்வாய் காங்கயம்-வெள்ளகோவில் நீா் பாதுகாப்பு சங்கத் தலைவா் வேலுசாமி உள்ளிட்டோா் பேசினாா். 500-க்கும் மேற்பட்ட விவசாயிகள் பங்கேற்றனா்.
