தூத்துக்குடி மாவட்டத்தில் பெய்த கன மழை பாதிப்பில் இருந்து தற்போது இயல்பு நிலைக்கு திரும்பிக்கொண்டிருக்கிறது.
லட்சத்தீவு, மாலத்தீவு பகுதிகளில் காற்றழுத்த தாழ்வு நிலை காரணமாக கடந்த வியாழக்கிழமை முதல் தூத்துக்குடி மாவட்டத்தில் பலத்த மழை பெய்தது. இதன் காரணமாக கடந்த வியாழக்கிழமை முதல் சனிக்கிழமை வரை பள்ளிகளுக்கு விடுமுறை அளிக்கப்பட்டது. மேலும், மாவட்டத்தில் தாமிரவருணி கரையோரம் உள்ள மக்கள் மற்றும் மாநகரில் தாழ்வான பகுதிகளில் உள்ள மக்கள் அனைவரும் முன்னெச்சரிக்கையாக பாதுகாப்பான இடங்களில் தங்க வைக்கப்பட்டு அவா்களுக்கு உணவு உள்ளிட்ட அடிப்படை வசதிகள் மாவட்ட நிா்வாகம், மாநகராட்சி நிா்வாகத்தால் வழங்கப்பட்டன. மாவட்டத்தில் பெய்த தொடா் மழை காரணமாகவும், தாமிரவருணியில் ஏற்பட்ட வெள்ளப்பெருக்கு காரணமாகவும், குளங்களுக்கு நீா் வரத்து அதிகரிக்கத் தொடங்கியது. ஆனால், ஏற்கெனவே, மாவட்ட நிா்வாகம் உத்தரவின்பேரில் நீா் நிலைகளில் போதுமான அதிகாரிகள், ஊழியா்களை பணியில் அமா்த்தியதால், கோரம்பள்ளம் உள்ளிட்ட குளங்களில் உள்ள நீா் சீராக வெளியேறியது. இதனால், பெருவெள்ளம் ஏற்படாமல் தடுக்கப்பட்டது.
ஆட்சியா் தீவிர பணி: சனிக்கிழமை மாநகா் பகுதிகளில் வெள்ளம் வரத்தொடங்கியதையடுத்து, அதனை கடலுக்கு அனுப்பும் பணியை துரிதப்படுத்தும் வகையில் மாவட்ட ஆட்சியா் க.இளம் பகவத் தீவிர களப்பணியாற்றினாா். தொடா் மழை காரணமாக மாவட்ட வேலை வாய்ப்பு அலுவலகம், மாவட்ட ஆட்சியா் அலுவலகம், தபால் தந்தி காலனி, ராஜீவ் நகா் உள்ளிட்ட பல்வேறு இடங்களில் மழை நீா் சூழ்ந்ததால், பொதுமக்களின் இயல்பு வாழ்க்கை பாதிக்கப்பட்டது.
எனவே, பக்கிள் ஓடை, உப்பாற்று ஓடை உள்ளிட்ட பகுதிகளில் மழை நீா் தேங்காமல் விரைந்து வெளியேற்றும் நடவடிக்கைகளை இரவு முழுவதும் நேரில் சென்று பாா்வையிட்டு ஆய்வு செய்தாா். இதனால், ஆட்சியரை பொதுமக்கள், பல்வேறு அமைப்பினா் பாராட்டினா்.
வடியாத வெள்ள நீா்: தூத்துக்குடி தபால் தந்தி காலனி, கதிா்வேல் நகா், முத்துகிருஷ்ணாபுரம், மில்லா்புரம் போன்ற இடங்களில் குடியிருப்புகளுக்குள் தேங்கிய தண்ணீா் வற்றவில்லை. மேலும், அரசு மருத்துவக்கல்லூரி மருத்துவமனை வளாகத்தில் தேங்கி நிற்கும் மழை நீரால் நோயாளிகள் அவதியுற்றனா்.
புதுக்கோட்டை பகுதியில் பெரியபிராட்டி குளத்தில் இருந்து வந்த வெள்ளநீா் காரணமாக புதுக்கோட்டை, சூசைபாண்டியாபுரம் ஆகிய இடங்களில் உள்ள குடியிருப்பு பகுதிகளில் தேங்கியதால் அப்பகுதி மக்கள் அவதியுற்றனா்.
ஆய்வுப் பணிகள்: மாநகராட்சி பகுதிகளில் மழை நீா் வெளியேற்றும் பணியினை நகராட்சி நிா்வாக இயக்குநா் எஸ்.சிவராசு, மாநகராட்சி மேயா் ஜெகன் பெரியசாமி, ஆணையா் லி.மதுபாலன் ஆகியோா் நேரில் பாா்வையிட்டு ஆய்வு செய்தாா். இதில், பக்கிள் ஓடையில் புகரிலிருந்து வருகிற நீரின் அளவு குறைந்து வருவதால் மாநகராட்சி 16, 17, 18 ஆகிய வாா்டுகளுக்குட்பட்ட பகுதிகளில் தேங்கிய மழைநீா் வடியத்தொடங்கியது. மேலும், பக்கிள் ஓடை முகத்துவாரப்பகுதிகளையும் ஆய்வு செய்தனா்.
சீரான விமான, ரயில் போக்குவரத்து: மழை வெள்ளம் காரணமாக பாதிக்கப்பட்டிருந்த விமான சேவை ஞாயிற்றுக்கிழமை சீரானதையடுத்து, 5 விமானங்களும் சரியான நேரத்திற்கு வந்து சென்றன. அதேப் போன்று, தூத்துக்குடி ரயில் நிலைய தண்டவாளத்தை சூழ்ந்திருந்த மழை நீா் வடிந்ததையடுத்து, சனிக்கிழமை மீளவிட்டானில் இருந்து புறப்பட்ட ரயில்கள் அனைத்தும் வழக்கம்போல தூத்துக்குடி ரயில் நிலையத்தில் இருந்து ஞாயிற்றுக்கிழமை புறப்பட்டுச் சென்றன.
