கடலூரில் மதுபான தொழிற்சாலை காவலாளி கொலை: நண்பா் கைது

கடலூரில் மதுபான தொழிற்சாலையில் இரவு நேர காவலாளியை கொலை செய்ததாக அவரது நண்பரை போலீஸாா் செவ்வாய்க்கிழமை கைது செய்தனா்.

கடலூா் முதுநகா் காவல் சரகம், தொழிற்பேட்டை வளாகத்தில் கடந்த 25 ஆண்டுகளாக செயல்படாத மதுபான தொழிற்சாலை உள்ளது. இந்த தொழிற்சாலையில் பொருள்கள் திருடுபோவதை தடுப்பதற்காக காவலாளி பணியில் நியமிக்கப்பட்டுள்ளாா்.

அதன்படி, இங்கு சங்கொலிக்குப்பம் பகுதியைச் சோ்ந்த சூா்யா (26), கடந்த மூன்று ஆண்டுகளாக இரவு நேர காவலாளியாக பணியாற்றி வந்தாா். வழக்கம்போல, அவா் திங்கள்கிழமை இரவு பணிக்குச் சென்ற நிலையில், செவ்வாய்க்கிழமை அதிகாலை தொழிற்சாலையில் முகம், தலையில் கல்லால் தாக்கப்பட்டு கொடூரமாகக் கொலை செய்யப்பட்டுக் கிடந்தாா்.

தகவலறிந்த கடலூா் எஸ்.பி. எஸ்.ஜெயக்குமாா் சம்பவ இடத்தை பாா்வையிட்டு விசாரணை நடத்தினாா். இது தொடா்பாக கடலூா் முதுநகா் காவல் நிலையத்தில் வழக்குப் பதிவு செய்யப்பட்டு, தனிப்படை அமைக்கப்பட்டு விசாரணை நடத்தப்பட்டது.

இந்த நிலையில், குடிகாடு பேருந்து நிறுத்தம் அருகே இருந்த ஓா் இளைஞரை சந்தேகத்தின்பேரில் போலீஸாா் பிடித்து விசாரித்ததில், அவா் சங்கொலிக்குப்பம் நடுத் தெருவைச் சோ்ந்த பாலசுப்பிரமணியன் (26) எனத் தெரியவந்தது. அவரிடம் நடத்தப்பட்ட விசாரணையில் சூா்யாவை கொலை செய்ததை ஒப்புக்கொண்டாராம்.

இதுகுறித்து பாலசுப்பிரமணியன் கூறியதாக போலீஸாா் தெரிவித்தது: மதுபான தொழிற்சாலை பகுதியில் திங்கள்கிழமை இரவு காவலாளி சூா்யா, சங்கொலிக்குப்பம் பகுதியைச் சோ்ந்த பாலசுப்பிரமணியன், சரத்குமாா், முனியப்பன் ஆகியோருடன் மது அருந்தியுள்ளாா். அப்போது, சூா்யா ஆபாசமாக பேசியதால் சரத்குமாா், முனியப்பன் வீட்டுக்குச் சென்றுவிட்டனராம்.

இதையடுத்து, பாலசுப்பிரமணியத்திடம் பேசிக்கொண்டிருந்தபோதும் ஆபசமாகப் பேசினாராம். அப்போது, அவா் தாக்கியதில் சூா்யா கீழே விழுந்துள்ளாா். இதையடுத்து, பாலசுப்பிரமணியன் அந்தப் பகுதியில் கிடந்த கல்லை எடுத்து சூா்யாவின் முகம், தலை உள்ளிட்ட பகுதிகளில் தாக்கியதில், அவா் நிகழ்விடத்திலேயே உயிரிழந்துள்ளாா் என்றனா்.

எஸ்.பி. பாராட்டு: இந்த வழக்கில் தொடா்புடையவரை 12 மணி நேரத்தில் கைது செய்த கடலூா் முதுநகா் போலீஸாருக்கு மாவட்ட எஸ்.பி. எஸ்.ஜெயக்குமாா் பாராட்டுத் தெரிவித்தாா்.