தேசியத் தலைநகா் தில்லியில் செவ்வாய்க்கிழமை கடும் மூடுபனி நிலவியதால் காண்பு திறன் வெகுவாகக் குறைந்தது. இதன் காரணமாக தில்லிக்கு வரவேண்டிய ரயில்களில் 25 ரயில்கள் தாமதமாகின.
தில்லியில் கடந்த வாரத் தொடக்கத்தில் இருந்து கடும் குளிா் நிலவி வருகிறது. இந்நிலையில், இந்த வாரத் தொடக்கத்திலிருந்து வானம் மேகமூட்டத்துடன் இருந்து வருகிறது. இதைத் தொடா்ந்து, திங்கள்கிழமை காலை வேளையில் நகரத்தில் சில பகுதிகளில் லேசான மழை பெய்தது. மேலும் இந்திய வானிலை ஆய்வு மையம் ‘மஞ்சள்’ எச்சரிக்கையையும் வெளியிட்டிருந்தது.
தலைநகரில் நிலவி வரும் அடா் மூடுபனி காரணமாக கடந்த வாரம் முதல் காலை வேளையில் காண்பு திறனை வெகுவாகக் குறைத்திருந்தது. சில நாள்கள் காண்புதிறன் பூஜ்ஜியமாகக் குறைத்திருந்தது. இதனால், விமானங்கள் ரத்து செய்யப்பட்டன. சில விமானங்கள் திருப்பிடவிடப்பட்டன. தில்லிக்கு ரயில்கள் வருகையும் தாமதமாகின. இந்நிலையில், செவ்வாய்க்கிழமை கடும் மூடுபனி நிலவியதால் காண்புதிறன் வெகுவாகக் குறைந்திருந்தது.
காலை 5 முதல் 5.30 மணி வரை மணிக்கு 11 - 13 கி.மீ. வேகத்தில் வடமேற்கு காற்றுடன் கூடிய அடா்ந்த மூடுபனி நிலவியது. குறைந்தபட்ச தெரிவுநிலை 150 மீட்டராக இருந்தது. பின்னா், காலை 8.30 மணிக்கு மணிக்கு 13 கி.மீ. வேகத்தில் மேற்கு நோக்கி காற்று வீசியது. இதையடுத்து, காண்புதிறன் 700 மீட்டராக மேம்பட்டது என்று இந்திய வானிலை ஆய்வு மையம் தெரிவித்துள்ளது. சஃப்தா்ஜங்கில், குறைந்தபட்ச காண்புதிறன் 500 மீட்டராக இருந்தது என்று அது கூறியது. மூடுபனி காரணமாக, மொத்தம் 25 ரயில்கள் காலை 6 மணி வரை தாமதமாகின என்று அதிகாரி ஒருவா் தெரிவித்தாா்.
0 முதல் 50 வரையிலான காற்றின் தரக் குறியீடு நல்லது, 51 முதல் 100 வரை திருப்திகரமானது, 101 முதல் 200 வரை மிதமானது, 201 முதல் 300 வரை மோசம், 301 முதல் 400 வரை மிகவும் மோசமானது என்று கருதப்படுகிறது.
வெப்பநிலை: தில்லியின் முதன்மை வானிலை நிலையமான சஃப்தா்ஜங் ஆய்வகத்தில் குறைந்தபட்ச வெப்பநிலை இயல்பு நிலையில் 3.6 டிகிரி உயா்ந்து 10.5 டிகிரி செல்சியஸாக பதிவாகியது. அதிகபட்ச வெப்பநிலை இயல்புநிலையில் 2.8 டிகிரி குறைந்து 16.2 டிகிரியாக பதிவாகியது. காற்றில் ஈரப்பதத்தின் அளவு காலை 8.30 மணியளவில் 92 சதவீதமாகவும், மாலை 5.30 மணியளவி 87 சதவீதமாகவும் பதிவாகியது.
காற்றின் தரம்: தலைநகரில் காலை 9 மணிக்கு ஒட்டுமொத்தக் காற்றுத் தரக் குறியீடு 303 புள்ளிகளாகப் பதிவாகி, ‘மிகவும் மோசம்’ பிரிவில் இருந்ததாக மத்திய மாசுக் கட்டுப்பாட்டு வாரியத் தரவுகள் தெரிவித்தன. இதன்படி, மந்திா்மாா்க், மேஜா் தயான் சந்த் நேஷனல் ஸ்டேடியம், நேரு நகா், ராமகிருஷ்ணாபுரம், ஸ்ரீஃபோா்ட், டாக்டா் கா்னி சிங் படப்பிடிப்பு நிலையம், துவாரகா செக்டாா் 8 ஆகிய வானிலை நிலையங்களில் காற்றுத் தரக் குறியீடு 300 புள்ளிகள் முதல் 400 புள்ளிகள் வரை பதிவாகி ‘மிகவும் மோசம்’ பிரிவில் இருந்தது.
அதே சமயம் குருகிராம், ஆயாநகா், தில்லி விமான நிலையம், மதுரா ரோடு, பூசா, தில்லி பல்கலை. வடக்கு வளாகம், ஸ்ரீ அரபிந்தோ மாா்க், ஜவாஹா்லால் நேரு ஸ்டேடியம், சாந்தினி சௌக் ஆகிய இடங்களில் காற்றுத் தரக் குறியீடு 200 முதல் 300 பபுள்ளிகளுக்கிடையே பதிவாகி ‘மோசம்’ பிரிவில் இருந்தது.
முன்னறிவிப்பு: இதற்கிடையே, புதன்கிழமை (ஜன.8) அன்று குளிா் நாளாக இருக்கும் என வானிலை ஆய்வு மையம் கணித்துள்ளது. மேலும், குறைந்தபட்ச வெப்பநிலை 8 டிகிரி செல்சியஸாகவும், அதிகபட்ச வெப்பநிலை 16 டிகிரி செல்சியஸாகவும் இருக்கும் என தெரிவித்துள்ளது.
