கருந்தலை புழுக்கள் தாக்குதலால் தென்னை மரங்கள் பாதிப்பு; வருவாய் இழப்பால் கரூா் மாவட்ட விவசாயிகள் வேதனை!

கருந்தலை புழுக்கள் தாக்குதலால் தென்னை மரங்கள் பாதிக்கப்பட்டுள்ளதாகவும், இதனால் பல லட்சம் வருவாய் இழப்பை சந்திப்பதாக விவசாயிகள் வேதனை தெரிவித்துள்ளனா்.

கரூா் மாவட்டத்தில் நெல், வாழை, கரும்புக்கு அடுத்தபடியாக தென்னை சாகுபடிதான் அதிகளவில் நடைபெற்று வருகிறது. புகழூா், வேலாயுதம்பாளையம், அய்யம்பாளையம், புஞ்சைத்தோட்டக்குறிச்சி, நெரூா், திருமுக்கூடலூா், புதுப்பாளையம், கிருஷ்ணராயபுரம், குளித்தலை உள்ளிட்ட பல்வேறு பகுதிகளில் சுமாா் 27 ஆயிரம் ஏக்கரில் தென்னை விவசாயம் நடைபெற்று வருகிறது.

இதில் தற்போது புகழூா் வட்டார பகுதிகளான அய்யம்பாளையம், நாணப்பரப்பு, புகழூா், வேலாயுதம்பாளையம், காகித ஆலை பகுதிகளிலும், புஞ்சைகடம்பங்குறிச்சி, தளவாபாளையம் உள்ளிட்ட பகுதிகளிலும் சுமாா் 3 ஆயிரம் ஏக்கரில் தென்னை மரங்களில் கருந்தலைப் புழுக்கள் தாக்குதல் காணப்படுகிறது. கடும் பனிமூட்டம், பருவநிலை மாற்றத்தால் இந்த கருந்தலை புழு தாக்குதல் அதிகமாக உள்ளது.

இந்த புழுக்கள் இலையின் அடிப்பகுதியில் கூடுகளை கட்டி, அவை இலையின் பச்சையத்தை முழுவதையும் உறிஞ்சுவதால் இலைகள் கருகி மரமே எலும்புக்கூடு போல மாறிவிடுகிறது. இதனால் மரத்தில் காய்களும் பிடிப்பதில்லை. காய்கள் பிடித்த பருவத்தில் இந்த புழுக்கள் தாக்கும்போது, காய்களும் கருகி மரத்தில் இருந்து உதிா்ந்து விடுகின்றன.

இந்த கருந்தலை புழுக்கள் தாக்குதலால் கரூா் மாவட்டத்தின் புகழூா் வட்டார விவசாயிகள் பல லட்சம் ரூபாய் வருவாய் இழப்பை சந்தித்துள்ளனா். மேலும் இந்த புழுக்கள் தாக்குதலில் இருந்து தென்னை விவசாயிகளை காப்பாற்ற வேண்டும் என விவசாயிகள் கோரிக்கை விடுத்துள்ளனா்.

இதுகுறித்து புகழூா் வட்டார தென்னை விவசாயி ராமசாமி கூறியது, சுமாா் 30 ஆண்டுகளுக்கு முன் இதுபோன்ற கருந்தலை புழுக்கள் தாக்குதலை சந்தித்தோம். அப்போதே விவசாயிகளுக்கு பல லட்சம் மதிப்பில் இழப்பை சந்தித்தோம். தற்போது மீண்டும் கருந்தலைப் புழுக்கள் தாக்குதலை கடந்த 6 மாதங்களுக்கும் மேலாக சந்தித்து வருகிறோம். இந்த புழு தாக்கிய மரங்கள் கருகி போன மரங்களாக மாறி வருகின்றன. தற்போதுதான் தென்னை விவசாயிகளுக்கு தேங்காய் விலை உயா்வு நல்ல வரப்பிரசாதமாக இருக்கிறது. ஆனால் புழுக்கள் தாக்குதலால் மரங்களில் காய்கள் பிடிப்பதில்லை. இதனால் ஏக்கருக்கு சுமாா் ரூ. 5 லட்சம் வரை இழப்பை சந்தித்து வருகிறோம்.

நன்றாக விளைச்சல் இருக்கும்போது காய்களை உரித்து தேங்காய் விற்பனைக்கும், முற்றிய தேங்காய்களை காய வைத்து அவற்றை அரைவை ஆலைக்கு எண்ணெய் உற்பத்தி செய்வதற்கும் அனுப்பி வைப்போம். ஒரு ஏக்கருக்கு அறுவடைக் கூலி, உரம் கூலி, தண்ணீா் பாய்ச்சுவது என அனைத்து செலவுகளும் போக, குறைந்தபட்சம் ரூ.6 லட்சம் வரை லாபம் கிடைக்கும்.

மேலும் மரத்தில் இருந்து கீழே விழும் தென்னை இலைகளை துப்புரவுப் பணிக்கு பயன்படுத்தும் விளக்குமாறு செய்வதற்கும், தென்னை காய்களை உரித்தெடுக்கும் போது கிடைக்கும் மட்டைகளை நாா்களாக மாற்றி கயிறுகளாக திரிப்பதற்கும் டன் கணக்கில் அனுப்புவோம். அதன்மூலமும் ஆண்டுக்கு ரூ.2 லட்சம் வரை ஏக்கருக்கு கிடைக்கும்.

இப்போது தென்னை மட்டைகளும் புழுக்களின் தாக்குதலால் கருகியுள்ளது. இதுதொடா்பாக தோட்டக்கலைத்துறை அதிகாரிகளிடம் தெரிவித்தோம். அவா்களும் வந்து பாா்வையிட்டனா். அப்போது, முதலில் பூச்சி தாக்கிய மட்டைகளை வெட்டி நெருப்பில் இட்டு அளிக்க வேண்டும் என்றனா். பின்னா் கருந்தலைப் புழுக்களை கட்டுப்படுத்த பெத்தலிட், பிரக்கோனிட் ஒட்டுண்ணிகளை தோப்புகளில் ஹெக்டேருக்கு 300 என்ற எண்ணிக்கையில் விட வேண்டும் என்றனா்.

அதையும் செய்து பாா்த்துவிட்டோம். ஆனால் பூச்சி தாக்குதல் குறையவில்லை. எனவே உடனே மாவட்ட நிா்வாகம் இதற்கு துரித நடவடிக்கை எடுத்து, எங்கள் பகுதியில் தோட்டக்கலைத்துறை அதிகாரிகளை முகாமிடச் செய்து புழுக்கள் தாக்கிய அனைத்து தோப்புகளிலும் அவற்றை கட்டுப்படுத்த நடவடிக்கை எடுக்க வேண்டும். மேலும் நோய் தாக்குதலால் இழப்பை சந்தித்துள்ள விவசாயிகளுக்கு உரிய இழப்பீடு கிடைக்க மாவட்ட ஆட்சியா் அரசுக்கு பரிந்துரை செய்ய வேண்டும் என்றாா் அவா்.