கரூா் வழியாக பேருந்தில் கடத்தி வரப்பட்ட ரூ.1.20 லட்சம் மதிப்புள்ள கஞ்சா பறிமுதல் -5 போ் கைது

ஆந்திரா மாநிலத்தில் இருந்து கரூா் வழியாக மதுரைக்கு பேருந்தில் கடத்திய ரூ.1.20 லட்சம் மதிப்புள்ள கஞ்சாவை போலீஸாா் வெள்ளிக்கிழமை பறிமுதல் செய்தனா். இதுதொடா்பாக 5 போ் கைது செய்யப்பட்டனா்.

கரூரில், திருக்காம்புலியூா் ரவுண்டானா பகுதியில் மாவட்ட ரெளடிகள் தடுப்புப் பிரிவு காவல் உதவி ஆய்வாளா் அகிலன் தலைமையிலான தனிப்படை போலீஸாா் வெள்ளிக்கிழமை காலை வாகனச் சோதனையில் ஈடுபட்டனா். அப்போது அங்குள்ள பேருந்து நிறுத்தத்தில் நின்றிருந்த தனியாா் பேருந்தில் சந்தேகத்துக்கு இடமளிக்கும் வகையில் பாா்சல் பெட்டிகள் இருந்தன.

உடனே போலீஸாா் பேருந்தில் ஏறியதும், போலீஸாரைக் கண்டதும் 5 இளைஞா்கள் பேருந்தில் இருந்து குதித்து ஓடினா்.

இதையடுத்து போலீஸாா் அவா்களை விரட்டிப்பிடித்து விசாரித்தனா். அப்போது அவா்கள் ஆந்திர மாநிலத்தில் இருந்து சேலம் வழியாக மதுரைக்கு கஞ்சா கடத்தி செல்வது தெரியவந்தது. இதையடுத்து போலீஸாா் 5 பேரையும் கைது செய்தனா். மேலும் 6 பாா்சல் பெட்டிக்குள் இருந்த 12 கிலோ எடையுள்ள ரூ.1.20 லட்சம் மதிப்பிலான கஞ்சாவையும் பறிமுதல் செய்தனா்.

பின்னா் அவா்களிடம் விசாரித்தபோது, விருதுநகா் மாவட்டம், காரியாப்பட்டி சமத்துவபுரத்தைச் சோ்ந்த நாகராஜன் மகன் நாகேந்திரன் என்கிற ரகு(29, மதுரை மாவட்டம், திருப்பரங்குன்றம் சாமியாா் பிள்ளைசந்து பகுதியைச் சோ்ந்த ஆறுமுகம் மகன் செந்தில்குமாா்(24), கோட்டைத் தெருவைச் சோ்ந்த முத்துக்குமாா் மகன் ராம்குமாா்(24), சிந்தாமணி நாகுபிள்ளைத் தோப்பு பகுதியைச் சோ்ந்த மாரிமுத்து மகன் யோகேஸ்வரன்(20), அனுப்பானடி தெரசா பள்ளி பகுதியைச் சோ்ந்த பாக்ய அந்தோணி மகன் நவீன்ராஜ்(20) ஆகியோா் என தெரிய வந்தது. இதையடுத்து 5 பேரையும் போலீஸாா் கரூா் குற்றவியல் நடுவா் நீதிமன்றத்தில் ஆஜா்படுத்தி சிறையில் அடைத்தனா்.