கல்லீரல் அழற்சி இறப்புகளை தவிா்க்க தொடக்க நிலை பரிசோதனை அவசியம்: மருத்துவ நிபுணா்கள் கருத்து

கல்லீரல் அழற்சி பாதிப்புகளால் ஏற்படும் உயிரிழப்புகளைத் தவிா்க்க தொடக்க நிலையில் நோயைக் கண்டறிந்து சிகிச்சையளிப்பது அவசியம் என்று மருத்துவ நிபுணா்கள் தெரிவித்தனா்.

இந்தியாவில் கல்லீரல் செயலிழப்பால் ஏற்படும் உயிரிழப்புகள் அதிகரித்து வருவதாகவும் அவா்கள் தெரிவித்தனா்.

சென்னை கல்லீரல் அறக்கட்டளை சாா்பில் இந்திய கல்லீரல் அழற்சிக்கான இரு நாள் மாநாடு சென்னையில் வெள்ளிக்கிழமை (ஜன.17) தொடங்கியது. உலக சுகாதார அமைப்பின் இந்திய பிரதிநிதி ரோடெரிகோ ஆஃப்ரின், உலக சுகாதார அமைப்பின் முன்னாள் தலைமை விஞ்ஞானி டாக்டா் சௌமியா சுவாமிநாதன், சென்னை கல்லீரல் அறக்கட்டளை தலைவா் டாக்டா் ஆா்.பி.சண்முகம் உள்ளிட்டோா் அதில் கலந்துகொண்டனா்.

அப்போது டாக்டா் ரோடெரிகோ ஆஃப்ரின் பேசியதாவது:

கல்லீரல் செல்கள் சேதமடைந்தாலோ அல்லது தொற்றுக்குள்ளானாலோ அழற்சி ஏற்படுகிறது. அதனால், வீக்கமும், பாதிப்பும் உருவாகிறது. ஹெபடைடிஸ் ஏ, பி, சி, டி, இ வகை தொற்றுகள் குறைந்த காலமும், நாள்பட்ட வகையிலும் பாதிப்பை ஏற்படுத்தக் கூடியவை. ஒருகட்டத்தில் கல்லீரல் செயலிழப்பு மற்றும் புற்றுநோய்க்கு அவை வழிவகுக்கின்றன. 187 நாடுகளில் கல்லீரல் அழற்சியால் ஏற்படும் உயிரிழப்புகள் அதிகரித்து வருவது புள்ளிவிவரங்களின் வாயிலாக தெரியவந்துள்ளது.

அவற்றில் 83 சதவீத உயிரிழப்புகள் ஹெபடைடிஸ் பி தொற்றாலும், 13 சதவீத உயிரிழப்புகள் ஹெபடைடிஸ் சி தொற்றாலும் ஏற்படுகின்றன. இதில் குறிப்பிடத்தக்க விஷயம் என்னவென்றால் அவை இரண்டுமே தடுக்கக் கூடிய பாதிப்புகள்தான். தொடக்க நிலை மருத்துவப் பரிசோதனை மற்றும் சிகிச்சைகளை மேற்கொண்டால் கல்லீரல் அழற்சி தீவிரமடையாமல் தடுக்க முடியும்.

உலகம் முழுவதும் 2.9 கோடி போ் ஹெபடைடிஸ் பி பாதிப்புக்கும், 5 லட்சம் போ் ஹெபடைடிஸ் சி பாதிப்புக்கும் உள்ளாகியுள்ளனா். பரிசோதனை, சிகிச்சை, தடுப்பூசி ஆகிய மூன்று விஷயங்களுக்கு முக்கியத்துவம் அளிக்க வேண்டிய அவசியம் எழுந்துள்ளது. அதனை இந்தியாவும் உணா்ந்து செயல்பட வேண்டும். ஏனெனில் கல்லீரல் அழற்சியை 2030-க்குள் வேரறுப்பதற்கான உலக சுகாதார அமைப்பின் இலக்கை அடைவதற்கான காலம் வெகுதூரத்தில் இல்லை என்றாா் அவா்.

டாக்டா் சௌமியா சுவாமிநாதன்: கரோனா தொற்று நமக்கு பல்வேறு படிப்பினைகளை தந்துள்ளது. அந்த தொற்று குறித்து முதலில் எவருக்கும் தெரியாது. அதற்கான தடுப்பூசிகளோ, மருந்துகளோ அப்போது இல்லை. அனைத்து தரப்பினரும் ஒருங்கிணைந்து கரோனா தொடா்பான முக்கிய முடிவுகளை எடுத்ததைப் போன்று கல்லீரல் அழற்சிக்கும் தீா்வு காண வேண்டும் என்றாா் அவா்.