கார் பார்க்கிங் தகராறு; செக்யூரிட்டி மீது துப்பாக்கிச் சூடு.. போதை ஆசாமி கைது!

டெல்லி மற்றும் நொய்டாவில் அடிக்கடி வாகனங்களை நிறுத்துவது தொடர்பாக அல்லது லிப்டில் ஏறுவது தொடர்பாக குடியிருப்பு வாசிகள் செக்யூரிட்டி கார்டுகளை தாக்குவது வழக்கமாக நடந்து கொண்டிருக்கிறது.

டெல்லி அருகில் உள்ள நொய்டாவில் இருக்கும் ராதா ஸ்கை கார்டன் அடுக்குமாடி குடியிருப்பு கட்டிடத்தில் வசிப்பவர் கெளரவ் சிசோடியா. இவர் சொந்தமாக பப் நடத்தி வருகிறார். இவர் வசிக்கும் கட்டிடத்தில் கடந்த சில நாள்களாக பார்கிங் பகுதியில் வாகனங்களை நிறுத்துவது தொடர்பாக குடியிருப்புவாசிகள் இடையே தகராறு இருந்து வந்தது. இது தொடர்பாக நேற்று முன் தினம் குடியிருப்புவாசிகளுக்கிடையே மோதல் ஏற்பட்டது.

அன்று இரவு கெளரவ் சிசோடியா தனது பப்பில் நன்றாக மது அருந்திவிட்டு காரில் வீட்டிற்கு வந்தார். அவர் காரை நிறுத்துவது தொடர்பாக செக்யூரிட்டி கார்டுகளுடன் கடுமையான வாக்குவாதத்தில் ஈடுபட்டார்.

இரு தரப்பினரும் கடுமையான வாக்குவாதத்தில் ஈடுபட்டனர். அப்போது, `துணிச்சல் இருந்தால் என்னை அடி பார்க்கலாம்' என்று சிசோடியா செக்யூரிட்டி கார்டுகளிடம் கூறினார். அதற்கு, `நாங்கள் ஏன் உங்களை அடிக்கவேண்டும், நீங்கள்தான் ஏழை செக்யூரிட்டி கார்டுகளை துன்புறுத்துகிறீர்கள்' என்று செக்யூரிட்டி கார்டுகள் தெரிவித்தனர்.

உடனே, 'நான் ஏழைகளை துன்புறுத்துகிறேனா?' என்று கேட்ட சிசோடியா, `வா வந்து என்னை ஒரு முறை தொட்டுப்பார்' என்று அதட்டினார். செக்யூரிட்டி கார்டுகளை சிசோடியா அடிக்க முயன்றார். உடனே, அங்கிருந்தவர்கள் அவர்களை தடுத்து நிறுத்தினர்.

செக்யூரிட்டி கார்டுகளை பார்த்து, `நீங்கள் பெண்களை மானபங்கம் செய்திருக்கிறீர்கள், அதனால், உங்களை சுடுகிறேன்' என்றவர், தன்னிடம் இருந்த துப்பாக்கியை எடுத்து சரமாரியாக சுட்டார். அவர் ஆறு முறை துப்பாக்கியால் சுட்டார். அதிர்ஷ்டவசமாக இதில் செக்யூரிட்டி கார்டுகள் யாருக்கும் பாதிப்பு ஏற்படவில்லை. இது குறித்து போலீஸில் புகார் செய்யப்பட்டது. போலீஸார் வழக்குப் பதிவு செய்து சிசோடியாவை கைது செய்தனர். இச்சம்பவத்தால் நள்ளிரவு வரை அக்கட்டிட வளாகத்தில் இருந்தவர்கள் உறங்க முடியாத நிலை ஏற்பட்டது.