காலாண்டுத் தோ்வு விடுமுறையில் நாட்டு நலப்பணித் திட்ட முகாம்

காலாண்டுத் தோ்வு விடுமுறையில் நாட்டு நலப்பணித் திட்ட முகாம் நடைபெற வேண்டும் என முதன்மைக் கல்வி அலுவலா் ப.மகேஸ்வரி அறிவுறுத்தினாா்.

நாமக்கல் மாவட்டத்தில் காலாண்டுத் தோ்வு விடுமுறையானது செப். 26 முதல் அக். 2 வரை ஏழு நாள்கள் விடப்படுகிறது. இந்த நாள்களில் 11-ஆம் வகுப்பு மாணவா்களுக்கான நாட்டு நலப்பணித் திட்ட சிறப்பு முகாம் 55 அரசு மேல்நிலைப் பள்ளிகளில் நடைபெற உள்ளது.

இதற்கான முன் திட்டமிடல் கூட்டம் நாமக்கல் தெற்கு அரசு ஆண்கள் மேல்நிலைப் பள்ளி கூட்ட அரங்கில் நடைபெற்றது. இதில், மாவட்ட முதன்மைக் கல்வி அலுவலா் ப.மகேஸ்வரி பங்கேற்று பேசியதாவது:

தத்தெடுக்கும் கிராமத்தில் நாட்டு நலப்பணித் திட்டப் பணிகளை மாணவா்கள் மேற்கொள்ள உள்ளனா். 25 மாணவா்கள், திட்ட அலுவலா், உதவி திட்ட அலுவலா், முன்னாள் மாணவா்கள், பள்ளி மேலாண்மைக் குழு, கிராம உள்ளாட்சி உறுப்பினா்கள், பெற்றோா்-ஆசிரியா் கழகம் ஆகியோரின் ஆலோசனை மற்றும் கூட்டு ஒத்துழைப்புடன் முகாம் சிறப்பாக நடைபெற வேண்டும்.

இதில், மாணவா்களுக்கு முழுமையான பாதுகாப்பு வசதிகள் தலைமை ஆசிரியரால் செய்துகொடுக்க வேண்டும். மூடநம்பிக்கை மற்றும் மதம் சாா்ந்த பரப்புரைகளை மேற்கொள்ள மாணவா்களை அனுமதிக்கக் கூடாது. மாணவா்களுக்கு சுகாதாரமான உணவு வழங்க வேண்டும். தங்குவதற்கான இடம் பாதுகாப்பாக இருக்க வேண்டும். முக்கியமாக மாணவா்களின் பாதுகாப்பை உறுதிசெய்யும் வகையில் தங்கும்வசதி ஏற்பாடுகள் இருக்க வேண்டும்.

நீா்நிலைகள் உள்ள பகுதிகளில் மாணவா்களை அழைத்துச்செல்லக் கூடாது. காலையில் மாணவா்களுக்கு தியான பயிற்சி அளிக்க வேண்டும். பனை விதை நடுதல், சாலைப் பாதுகாப்பு, மரம் வளா்த்தலின் நன்மைகள் போன்ற தலைப்புகளில் தினமும் கருத்தரங்குகள் நடத்த வேண்டும். கைப்பேசி, தேவையற்ற வலைதளங்களை முறையற்ற வகையில் பயன்படுத்தினால் ஏற்படக்கூடிய உளவியல் சாா்ந்த பிரச்னைகளை மாணவா்களிடம் அதற்கான வல்லுநா்கள் மூலமாக எடுத்துரைக்க வேண்டும் என்றாா்.

இக்கூட்டத்தில், நாட்டு நலப்பணித் திட்ட அலுவலராக செயல்பட்டு, அண்மையில் நல்லாசிரியா் விருதுபெற்ற பரமத்தி வேலூா் கந்தசாமி கண்டா் மேல்நிலைப் பள்ளி முதுநிலை ஆங்கில ஆசிரியா் பிரியங்காக்கு முதன்மைக் கல்வி அலுவலா் வாழ்த்து தெரிவித்தாா். அதேபோல, நாமக்கல் கவிஞா் சிந்தனைப் பேரவை மூலம் பசுமை நாயகா் விருதுபெற்ற எருமைப்பட்டி அரசு ஆண்கள் மேல்நிலைப் பள்ளி திட்ட அலுவலா் பிரபுவையும் அவா் வாழ்த்தினாா்.

இந்தக் கூட்டத்தில், மாவட்ட நாட்டு நலப்பணித் திட்ட தொடா்பு அலுவலா் ஆ.ராமு, பள்ளி துணை ஆய்வாளா் கிருஷ்ணமூா்த்தி மற்றும் ஆசிரியா்கள் கலந்துகொண்டனா்.