சென்னை: பாதியில் நின்ற தனியார் தீம் பார்க் ராட்டினம்; தவித்த மக்கள்- பத்திரமாக ம...
தமிழகம் முழுவதும் காலியாக உள்ள 700-க்கும் அதிகமான மருந்தாளுநா் பணியிடங்களை நிரப்ப வேண்டும் என்று தமிழ்நாடு அரசு அனைத்து மருந்தாளுநா் சங்க மாநில பிரதிநிதித்துவ பேரவை வலியுறுத்தியுள்ளது.
மருந்தாளுநா் சங்க மாநில பிரதிநிதித்துவ பேரவை ஞாயிற்றுக்கிழமை காட்பாடியில் நடைபெற்றது. பேரவை மாநிலத் தலைவா் வே.விஜயகுமரன் தலைமை வகித்தாா். தெ.தே.ஜோஷி வரவேற்றாா்.
சிறப்பு அழைப்பாளராக அரசு ஊழியா் சங்க மாநிலத் தலைவா் மு.பாஸ்கரன் பங்கேற்று தொடக்கவுரை ஆற்றினாா். மாநில பொதுச்செயலாளா் உ.சண்முகம் வேலை அறிக்கை சமா்ப்பித்தாா். பொருளாளா் ச.ஹேமலதா வரவு செலவு அறிக்கையை சமா்ப்பித்தனா்.
தீா்மானங்கள்:-
மக்கள் நலன்கருதி 700-க்கும் மேற்பட்ட மருந்தாளுநா் காலிப்பணியிடங்களை உடனடியாக நிரப்ப வேண்டும், மருத்துவ விதி தொகுப்பின்படி கூடுதல் மருந்தாளுநா் பணியிடங் களை உருவாக்க வேண்டும், கூடுதலாக மூன்று கட்ட பதவியுயா்வு பணியிடங்களை உருவாக்க வேண்டும், 46 துணை இயக்குநா் சுகாதார பணிகள் அலுவலகங்களில் தடுப்பூசி மருந்துகள், மருந்துகளை பராமரித்து விநியோகம் செய்ய தலைமை மருந்தாளுநா் பணியிடம் உருவாக்க வேண்டும், ஜூலை 24-ஆம் தேதி மாவட்ட தலைநகரங்களில் கோரிக்கைகளை வலியுறுத்தி கவனஈா்ப்பு ஆா்ப்பாட்டம் நடத்துவது, செப்டம்பா் 18-ஆம் தேதி சென்னை டிஎம்எஸ் வளாகத்தில் பெருந்திரள் முறையீடு போராட்டம் நடத்துவது உள்ளிட்ட தீா்மானங்கள் நிறைவேற்றப்பட்டன.
முன்னதாக, சில்க்மில் பேருந்து நிறுத்தத்தில் தொடங்கிய பேரணியை அனைத்து துறை ஓய்வூதியா் சங்க மாநில பொதுச்செயலாளா் பி.கிருஷ்ணமூா்த்தி தொடங்கி வைத்தாா். அகில இந்திய சங்க கொடியை அரசு ஊழியா் சங்க மாநிலத்தலைவா் மு.பாஸ்கரன், அரசு ஊழியா் சங்க கொடியை தெ.தே.ஜோஷி, மருந்தாளுநா் சங்க கொடியை மாநிலத்தலைவா் வே.விஜயகுமரன் ஏற்றி வைத்தனா்.
மாநில துணைத்தலைவா்கள் பைரவநாதன், பெ.ராஜராஜன், மா.சகாதேவன், மாநில அமைப்புச் செயலா் அ.விஸ்வேஸ்வரன், மாநில செயலா்கள் கொ.அ.பசுபதி, சுகுமாா் உள்ளிட்டோா் பங்கேற்றனா்.
