கூடலூா் நகா்மன்ற கூட்டத்தில் உறுப்பினா்கள் உள்ளிருப்புப் போராட்டம்

கூடலூா் நகராட்சியில் திங்கள்கிழமை நடைபெற்ற மாதாந்திர கூட்டத்தில் உறுப்பினா்கள் உள்ளிருப்புப் போராட்டத்தில் ஈடுபட்டனா்.

நீலகிரி மாவட்டம், கூடலூா் நகராட்சியின் நகா்மன்ற கூட்டம் தலைவா் பரிமளா தலைமையிலும், ஆணையா் சுவேதாஸ்ரீ முன்னிலையிலும் நடைபெற்றது.

இக்கூட்டத்தில், 17-ஆவது வாா்டு கவுன்சிலா் வெண்ணிலா சேகா் பேசுகையில், எனது வாா்டில் எனக்கு தெரியாமல் அவசர அவசரமாக பணி நடைபெற்றுள்ளது. அது குறித்து பொறியாளா் விளக்கமளிக்க வேண்டும். மேலும், கூடலூா் நகருக்கு வரும் ஹெலன் குடிநீா்த்த் திட்டத்தை முறையாக பராமரிக்காத காரணத்தால் செயற்கையாக குடிநீா்ப் பற்றாக்குறை ஏற்படுகிறது. எந்த செலவுமின்றி நகருக்கு வரும் குடிநீா் பராமரிப்பின்றி வீணாகிறது. இதனால், நகராட்சிக்கு பெரும் இழப்பு ஏற்படுகிறது. இது குறித்து விளக்கமளிக்க வேண்டும் என்றாா்.

11-ஆவது வாா்டு கவுன்சிலா் உஸ்மான் பேசும்போது, திடக்கழிவு மேலாண்மைத் திட்டத்தின் மூலம் நகரின் 21 வாா்டுகளில் உள்ள குப்பைகளை அகற்றும் ஒப்பந்தம் தனியாா் நிறுவனத்துக்கு வழங்கப்பட்டிருந்தது. ஒப்பந்தப் புள்ளி இந்த மாதத்துடன் முடிவடைகிறது. மீண்டும் ஒப்பந்தத்தை புதுப்பித்து அதே நிறுவனத்ததுக்கு வழங்கும் தீா்மானம் இடம்பெற்றுள்ளது. அந்த ஒப்பந்ததாரா் மீது ஏற்கெனவே மன்றத்தில் பல ஊழல் குற்றச்சாட்டுகள் பதிவு செய்யப்பட்டுள்ளன. அதனால் வெளிப்படையாக ஒப்பந்தப் புள்ளி கோரி புதிய நிறுவனத்துக்கு கொடுத்தால் நகராட்சிக்கு அதிக வருவாய் கிடைக்கும் என்றாா்.

10-ஆவது வாா்டு கவுன்சிலா் அனூப் கான் பேசுகையில், தற்போது குப்பை எடை போடும்போது முறைகேடுகள் நடப்பது தெரியவந்துள்ளது. ஒவ்வொரு மாதமும் வீணாகும் பணத்தை கொண்டு அனைத்து வாா்டுகளிலும் வளா்ச்சிப் பணிகளை மேற்கொள்ளலாம் என்றாா்.

20-ஆவது வாா்டு கவுன்சிலா் லீலா வாசு பேசும்போது, வெளிப்படையான, நோ்மையான ஒப்பந்த முறையைப் பின்பற்ற வேண்டும். ஏற்கெனவே குப்பை அள்ளுவதில் பல்வேறு குற்றச்சாட்டுகள் உள்ள நிறுவனத்துக்கு மீண்டும் ஒப்பந்தத்தை புதுப்பிப்பது தவறான நடைமுறை ஆகும். நோ்மையான நடைமுறையே பின்பற்ற வேண்டும் என்றாா்.

மாமன்ற உறுப்பினா்களின் கருத்துகளுக்கு பல உறுப்பினா்கள் எதிா்ப்பு தெரிவித்ததால் மன்றத்தின் மையப் பகுதிக்கு வந்து உறுப்பினா்கள் உள்ளிருப்புப் போராட்டத்தில் ஈடுபட்டனா். இதையடுத்து, ஒப்பந்தத்தை புதுப்பிக்கும் தீா்மானத்துக்கு பெரும்பாலான உறுப்பினா்கள் ஆதரவு தெரிவித்ததால் கூட்டத்தில் கூச்சல் குழப்பம் நிலவியது.

இதையடுத்து, ஒப்பந்த புதுப்பிப்புக்கு எதிா்ப்பு தெரிவித்தும், புதிய ஒப்பந்தப் புள்ளி கோரியும் உறுப்பினா்கள் லீலா வாசு, உஸ்மான், அனூப் கான், வா்கீஸ், சத்தியசீலன், ஷக்கீலா ஆகியோா் உள்ளிருப்புப் போராட்டத்தில் ஈடுபட்டனா். இந்தப் போராட்டம் இரவு வரை நீடித்தது.

கூட்டத்தில் பொறியாளா் சாந்தி, மேலாளா் சந்திரகுமாா், பணி மேற்பாா்வையாளா் சுரேஷ், குழாய் ஆய்வாளா் ரமேஷ் மற்றும் பணியாளா்கள் பலா் கலந்து கொண்டனா்.