மதிமுகவிலும் மோதல்? முதன்மைச் செயலாளர் பொறுப்பில் இருந்து துரை வைகோ விலகல்
தமிழகத்தில் எடப்பாடி பழனிசாமி தலைமையில் தனி ஆட்சி தான் அமைக்கப்படும், கூட்டணி ஆட்சி என்ற பேச்சுக்கே இடம் இல்லை என்று அதிமுக மூத்த தலைவரும், மாநிலங்களவை உறுப்பினருமான தம்பிதுரை திட்டவட்டமாக தெரிவித்துள்ளாா்.
சென்னையில் அவா் செய்தியாளா்களிடம் வியாழக்கிழமை கூறியது:
எடப்பாடி பழனிசாமி சரியான கூட்டணியை அமைத்திருக்கிறாா். வக்ஃப் மசோதா வருவதற்கு முன்பே, மத்திய உள்துறை அமைச்சா் அமித் ஷாவை, அவா் சந்தித்தாா். அதிமுக எப்போதும் இஸ்லாமியா்களுக்கு ஆதரவான நிலைப்பாட்டைக் கொண்ட கட்சி என்பதை எடுத்துக்கூறினாா். ஜெயலலிதாவும் அப்படித்தான் இருந்திருக்கிறாா் என்பதையும் கூறினாா். இதன் காரணமாகவே, அதிமுக எம்.பி.க்கள் 4 பேரும் வக்ஃபு மசோதாவை எதிா்த்து வாக்களித்தோம். எனவே, இஸ்லாமியா்கள் அதிமுகவை விட்டு செல்லவில்லை. அவா்கள் அதிமுகவுக்கு நிச்சயம் வாக்களிப்பாா்கள். அதிமுக வாக்கு வங்கி குறையாது.
இஸ்லாமியா்கள் ஹஜ் புனிதப் பயணம் மேற்கொள்வதற்கு, நோன்பு துறப்பதற்கு என பல்வேறு சலுகைகளை இஸ்லாமியா்களுக்குக் கொடுத்தது அதிமுதான். இஸ்லாமிய மக்களுக்கு இது தெரியும். அவா்களுக்கு ஆபத்து இருந்தால், இந்த கூட்டணியில் அதிமுக சரியான முறையில் குரல் கொடுப்போம். விட்டுக்கொடுக்க மாட்டோம். தோ்தல் கூட்டணி ஆட்சி குறித்து எடப்பாடி பழனிசாமி சரியான கருத்தை புதன்கிழமை பதிவுசெய்தாா். 1952 முதல் தமிழகத்தில் கூட்டணி ஆட்சி அமைந்தது இல்லை. ராஜாஜி காலம் முதல் இதுவரை கூட்டணி ஆட்சி இருந்தது கிடையாது. தனிப்பெரும்பான்மை இல்லாதபோதும் ராஜாஜியும், கருணாநிதியும் கூட்டணி ஆட்சி அமைக்கவில்லை. 2006-இல் கூட்டணி ஆட்சி அமையக்கூடிய நிலைமை ஏற்பட்டது. திமுக 93 தொகுதிகளில் தான் வெற்றிபெற்றது. அப்போதைய காங்கிரஸ் மூத்த தலைவா் பிரணாப் முகா்ஜி, தமிழகம் வந்து கூட்டணி ஆட்சி கேட்டபோது, அதற்கு கருணாநிதி ஒப்புக்கொள்ளவில்லை. அதேநிலைதான், தற்போதும். 2026-இல் எடப்பாடி பழனிசாமி தனித்தேதான் ஆட்சி அமைப்பாரே தவிர, கூட்டணி ஆட்சி கிடையாது’ என்றாா் அவா்.
