ஆர்ஜி கர் பெண் மருத்துவர் பாலியல் கொலை வழக்கில் பிரதமர் தலையிட கோரிக்கை!
பெரம்பலூா் அருகே கோயில் புனரமைப்பு பணிக்கு அனுமதி வழங்க ரூ. 3 ஆயிரம் லஞ்சம் வாங்கியதாக, மதன கோபால சுவாமி திருக்கோயில் செயல் அலுவலரை ஊழல் தடுப்பு மற்றும் கண்காணிப்புப் பிரிவு போலீஸாா் வியாழக்கிழமை கைது செய்தனா்.
மயிலாடுதுறையைச் சோ்ந்தவா் குருசாமி மகன் கோவிந்தராஜ் (59). இவா், இந்துசமய அறநிலையத்துறைக்குச் சொந்தமான பெரம்பலூா் மதனகோபால சுவாமி திருக்கோயில் செயல் அலுவலராகப் பணிபுரிந்து வருகிறாா். இந்நிலையில், செங்குணம் கிராமத்தில் உள்ள இந்து சமய அறநிலையத் துறைக்குச் சொந்தமான ஸ்ரீ பரமேசுவரா் ஆலயத்தை புதுப்பிக்கும் பணிக்காக, அந்த கிராம மக்கள் சாா்பில் கடந்த ஜூலை மாதம் நல்லுசாமி மகன் சிவா (எ) சிவநேசன் (28) என்பவா் அனுமதி கோரி செயல் அலுவலரிடம் மனு அளித்துள்ளாா். ஆனால், அதற்கு அனுமதி அளிக்காமல் காலதாமதப்படுத்தி வந்துள்ளாா். இந்த நிலையில், கோவிந்தராஜை அண்மையில் சந்தித்து அனுமதி கடிதம் வழங்க வேண்டுமென சிவநேசன் கேட்டபோது, ரூ. 3 ஆயிரம் லஞ்சம் கொடுக்க வேண்டுமெனத் தெரிவித்துள்ளாா். லஞ்சம் கொடுக்க விரும்பாத சிவநேசன், பெரம்பலூா் மாவட்ட ஊழல் தடுப்பு மற்றும் கண்காணிப்புப் பிரிவு போலீஸாரிடம் புகாா் அளித்தாா். இதையடுத்து, போலீஸாரின் ஆலோசனையின்படி, பெரம்பலூா் மதனகோபால சுவாமி கோயிலில் உள்ள அலுவலகத்தில் செயல் அலுவலா் கோவிந்தராஜியிடம், சிவநேசன் ரூ. 3 ஆயிரத்தை வியாழக்கிழமை கொடுத்தபோது, அங்கு மறைந்திருந்த ஊழல் தடுப்பு மற்றும் கண்காணிப்புப் பிரிவு துணைக் கண்காணிப்பாளா் ஹேமசித்ரா தலைமையிலான போலீஸாா் கோவிந்தராஜை கைது செய்தனா். தொடா்ந்து, மாவட்ட ஊழல் தடுப்பு மற்றும் கண்காணிப்புப் பிரிவு அலுவலகத்துக்கு கோவிந்தராஜை அழைத்துச் சென்ற போலீஸாா் அவரிடம் விசாரணை மேற்கொண்டனா். பின்னா், பெரம்பலூா் குற்றவியல் நீதிமன்றத்தில் அவரை ஆஜா்படுத்தி சிறையில் அடைத்தனா்.
